MZP-te lungawi lohna lantir avangin MBBS leh BDS counselling ṭhulh a ni

National Eligibility & Entrance Test (NEET) kaltlanga Mizoram quota-a MBBS leh BDS zir tur thlannaa Category-I ah Chakma zirlai paruk leh vai pakhat an awm ve duh loh lantir nan, nimin khan MZP-te'n Higher & Technical Education (HTE) department-a Technical Wing pisaah MBBS leh BDS counselling neih tur an dang.

MBBS leh BDS counselling neih tur dang tur hian MZP-te chu zing dar 9 velah HTE Technical Wing pisa kawtah an pung khawm a, counselling nei tur Chakma zirlaite an dang. Hun eng emaw chen police nen an innawr buai hnuah HTE secretary Benjamina'n MZP hruaitute biain, thil awm dan a sawipui.

HTE Secretary-in MZP phût anga counselling neih chu ṭhulh a nih tur thu leh sorkar aṭanga thu leh awm hma chu counselling chhunzawm a nih loh tur thu a sawi hnuah MZP-te chu an ṭîndarh a ni.

MZP hruaitute chuan nimin khan emergency meeting nei nghalin, "The Mizoram (Selection of Candidates for Higher Technical courses) Rules hnuaia ram leilung fate awmna tur category-I ah ram leilung fa ni lo an tel hi kan hrethiam lo hle a, engti kawng mahin kan pawm thei lo. Mizoram sorkar pawh ram leilung fate tana ding turin kan beisei a ni," an ti.

Ram leilung fa ni lo chunga category-I a awm zirlaite chu Mizote chanvo chuhpui lo turin ṭha takin an hril nia sawiin MZP chuan, "Min chuh lui a nih chuan eng pawh an chunga thleng se an cho chhuahah kan ngai ang," an ti a; Mizote chanvo chu Chakma leh hnam dangte tana pek chhuah a phal ngai dawn lo tih an sawi.

MZP chuan Mizoram quota-a MBBS leh BDS zir turah Mizo zirlaite'n tluang taka counselling neih ngei an duh tih sawiin, "Mizoram sorkar pawh counselling a rang thei ang bera chhunzawm turin kan ngen. Mizote chanvo min chuhpuitu Chakma leh hnam dangte beih lêt kawngah Mizo mipui zawng zawng thlawpna kan ngen a ni," an ti.

Mizoram quoata-a technical course hrang hrang zir tur thlanna dan, The Mizoram (Selection of Candidates for Higher Technical Course Fifth Amendment) Rules chu MZP nawrna avangin kum 2014 khan Mizoram sorkarin a siam ṭha a; The Mizoram (Selection of Candidates for Higher Technical Course Sixth Amendment) Rules tichhuakin, category-I a awm ṭhin Chakma-te chu category II-ah dah an ni.

Rules siamṭhat chu duh loin, Chakma Students Union chu Gauhati High Court-ah an zualko a, High Court chuan Mizoram sorkar chu rules thar hmang rih lo tura a tih avangin, rules hlui angin Chakma-te chu category-I an awm a ni.

MBBS leh BDS zir tur thlanna hi State Medical and Technical Entrance Examination (SMATE) kaltlanga neih ṭhin a ni a; April 18, 2016 khan Supreme Court-in MBBS leh BDS zir tur reng reng NEET kaltlanga thlan tur a nih thu thupek a chhuah a, nikuma MBBS leh BDS zir tur thlanna chu Supreme Court thupek nen a inhnaih chilh avangin SMATE hmanga thlan a ni.

Kuminah chuan Supreme Court thu angin NEET kaltlanga thlan a ni ta a, a thlan kawngah hian state sorkar a inrawlh lo a, zirlaite chu NEET-a an tihṭhat dan indawta koh an ni. Kumin hian Mizoramin MBBS seat 38 leh BDS seat 10 a nei.

The Mizoram (Selection of Candidates for Higher Technical Course Fifth Amendment) Rules-ah hian category-I a awm theite chu 'Indigenous People of the State of Mizoram' tih a ni a, MZP-te chuan Chakma-te chu indegenous-ah an pawm thei lo a ni.