2016-17 ah damlo 24,824 tan Cheng nuai 2467.64 hman a ni

Kum 2017 chhunga Ras­trya Swasthya Bima Yo­gana (RSBY) review mee­ting vawi khatna chu nimin khan Synod Confe­rence Centre-ah neih a ni a, Health sec­retary Lalrinliana Fanai-in a hmanpui. Kum 2016-17 chhung khan RSBY leh Health Care Scheme hnuaiah damlo 24,824 hnenah Rs. 24,67,64,429 pek a ni.

RSBY review meet-ing-ah hian Mizoram hmun hrang hranga RSBY hotute leh a khawihtute an tel a, RSBY zawmtu mimal damdawi-ina hotu­te an tel bakah, insuarance company aṭangin NIC manager John Rymbai leh a thawhpuite an tel.

Chawhma lamah dam­dawi-in hrang hrangin insurance lamte nena harsatna an neihte chinfel dan tur sawiho a ni a, bill eng emaw zat la tihfel lohte chinfel vat theih dan turte an sawiho. Chawhnu lamah medical officer te, district coordinator-te leh RSBY operator-te data collection chungchang zirtir an ni thung.

RSBY leh Health Care Scheme hi kum 2010-ah kalpui kawp ṭan a ni a, kum 2016-17 khan damlo mi 24,824 hnenah damdawia inenkawlna senso pek niin, sum pek chhuah zat chu Health Care Scheme-ah Rs. 14,53,40,182 leh RSBY-ah Rs. 10,14,24,247 a ni.

RSBY leh HCS hi Nov 2016 thleng bill pek chhuah tawh a ni a, tunah hian bill dawn tawh la chinfel loh 833 awmin, chumia damlote senso belhkhawm chu Rs. 2,44,85,211 a ni.