Sorkarna kan siam chuan sangha khawi Kan ngai pawimawh ang - ZNP President

ZNP president Lalduhoma chuan, sorkarna an siam chuan sangha khawi an ngai pawimawh dawn tih a sawi a, "Hawh u, a ngaihna hria sorkar ngei i siam tawh ang u," a ti.

Lalduhoma hian nimin khan an pisaah thuthar thehdarhtute a kâwm a; Mizoramin sangha dil siam theihna ram hectare 24,000-a zau a nei tih sawiin, "Chuta ṭanga 20% lek chu siam a la ni a, 80% chu siam lohin a la awm. Fisheries department hi kum 45-a upa a ni a, sangha khawi theihna ram kan neih aṭangin ½% pawh kum khatah kan siam lo," a ti a; state dang aṭanga sangha leina atan Mizoramin kum khatah cheng vbc. 36 a sên ṭhin thu a sawi.

Kum 2015-16 chhunga Mizo­rama sangha thar zat chu metric ton 6,828 a nih thu sawiin Duhoma chuan, "Tualchhung sangha, vai hnena hralh bakah vai hnen aṭanga lo lut lehte hi kan tharah chhiar tel a nih avangin, kan thar dik tak chu hei ai hian a tlem a rinawm. New Market aṭanga zir chiannaah chuan, tualchhung sangha dik tak hi chu ni khat zawrh tham pawh a tling lo. Economic Survey-in a tarlan metric ton 6,828 hi kum khata kan thar zatah pawm ta ila, chu chu kan mamawh aṭangin 36% chauh a ni," a ti.

ZNP President chuan, Mizoram Fish Farmers Association hruai-tute'n Tripura an tlawh tih sawiin, "Tripura-ah chuan self help group an din a, a ṭhente phei chu hmeichhe hlang an ni. An bul ṭanna sum chu a thlawnin sorkarin a pe a, sangha kg. khat thar nana an senso zat chu Rs. 14.90 a ni a, chu chu sorkarin Rs. 16-in a leisak vek a market-a zawrh atan a thlawnin a pe chhuak leh a ni," a ti a; Tripura-ah farmer-te'n sangha rate leh a market hre sain hna an thawh thu a sawi.

Lalduhoma sawi danin, Tripura-ah chuan sorkarin sangha chaw siamna factory an dintir a, chu chu sorkarin a leisak a, fish farmer-te hnenah duh tâwka an hman tham a thlawnin a pe chhuak ṭhin. Mizoramah chuan sangha chaw a váng em em a, duh ang zat lei tur a awm ngai lo. A awm chhun pawh a to a, sangha khawitute'n a man 25% an pek ve a ngai. Hei hi Zoramin sangha a thar tam ve theih lohna chhan lian ber a ni.

Mizoramah Fisheries depart­ment-in administration-ah harsatna an tâwk reng tih sawiin Lalduhoma chuan, "An administrative set-up hi tihfelsak a, MCS officer-te ngei enkawltir a ngai. Department tihlen vak pawh a ṭul lo, farmer-te pui theitu ni tura duat taka enkawl a ngai. Department upa ber pawl ni chung­in budget an neih a beitham a, an innghahna ber chu Fish Farmers Development Agency, National Fishe­ries Development Board, CSS leh RKVY aṭanga sum an hmuhte a ni," a ti.

ZNP President chuan, sangha chaw chu a khawitute mamawh zat a thlawna pek an nih chuan Tripura-in hectare khata an thar zatve, qtl. 24 pawh thar ni se, tuna thar zat let riatin a tam dawn thu sawiin, "Dil kan neih sa aṭang pawh hian kum khatah qtl. 54,624 kan thar thei dawn. Chu chuan tuna sanghaa kan intodelh lohna qtl. 18,967 a phuhrûk bakah, thawn chhuah tur qtl. 35,657 a la awm thei dawn a ni," a ti a; sangha aṭangin kum khatah cheng vbc. 53 lak luh theih a nih dawn thu a sawi bawk.