MZP-in HSSLC topper-te chawimawi

MZP chuan nimin khan an pisapuiah kumin HSSLC Examinations-a Arts, Science leh Commerce-a ti ṭha berte chawimawina hun an hmang a; chawimawina leh lawmpuina thilpek an hlân.

Inkhawm kaihruaitu MZP president B Vanlaltána chuan, chawimawi tlak leh phûte MZP-in an chawimawi ṭhin thu sawiin, "Vawiina kan chawimawi HSSLC topper-te pawh kan ram, hnam leh khawtlang tana malsawmna ni zel turin kan beisei dawn che u. In tuina ṭheuhah hlawhtling tlâka ṭhahnemngai taka zir zel turin ka chah che u a ni. Hringnunah harsatna tam tak tâwk thei kan ni a, harsatna kan tâwk a nih pawhin, chakna leh huaisenna nen hma lam pan tlat turin duhsakna kan hlan a che u," a ti.

MZP-in chawimawina an hlante chu - HSSLC Arts-a pakhatna Christina Lalchhandami, Greenland HSS leh Lalhlimpuii, St. Joseph HSS te, Science-a pakhatna Lalremsiama Darchhun, St. Paul's HSS leh, Commerce-a pakhatna Lalhriatpuia Ralte, St. Joseph HSS-te an ni. Arts-a pariatna Vanlalvenhimi, Durtlang HSS hnenah lawmpuina an hlàn nghal bawk.