World Vision-in tuilian tuarte ṭanpui
Kumin June thlaa Khawthlangtuipui lian tuartu, Tlabung leh a chhehvel khaw 12-a chhungkaw 833 hnenah nimin khan World Vision India-in ṭanpuina thilpek chi hrang hrang an sem.
Ṭanpuina sem pual hian Tlabung Branch YMA Rûnah inkhawm tâwi buatsaih a ni a, World Vision India coordinator Thanglunpaua Guite-in a kaihhruai. Hun hmanpuitu Tlabung SDO(C) M Misael chuan, khuarel chhiatna tuartute tana World Vision India an che chhuak chu lawmawm a tih thu sawiin, tuilian tuartute chu ṭanpuina an dawnte ṭang-
kai taka hmang turin duhsakna a hlan.
World Vision India-a Human Emergency Affairs director Kunal Shah chuan, tuilian tuarte ṭanpui tura hma an laknaah pawl hrang hrangin ṭha taka an thawhpui avangin lawmawm a tih thu a sawi a, "Ṭanpuina sem hma hian tih tur tam tak a awm a, phût nei loa mi tlàwmngaite'n min puihna azarah a mamawhte hnenah ṭanpuina kan sem theih phah a ni," a ti.
Tlabung Branch YMA president Zokunga Sailo pawhin, kumin June thlaa Khaw-thlangtuipui lian chu kum dang zawng aiin Tlabung leh a chhehvel mipuiin an tuar nasa tih sawiin, kum danga tuilian aiin chhiatna a thlen nasa zawk tih a sawi a; tuilian tuartute chhawmdawlna tura World Vision India-in hma a la chu lawmawm a tih thu a sawi bawk.
World Vision India hian Khawthlangtuipui lian tuarte chhawmdawlna atan sum hman tur Emergency Fund cheng nuai 32 an ruahman a; Tlabung leh a chhehvel khaw 12-a chhungkaw 833-te hnenah hian buhfai, dâl, tél, chì, bungbél, silpauline, âwngphah leh inchhungkhur mamawh dangte an sem a ni.
Tlabung Post editor Vanlalhriatpuia hnen aṭanga thu dawn danin, Khawthlangtuipui lian tuartute hian kohhran pathum - Mizoram Presbyterian Kohhran, Baptist Church of Mizoram leh Salvation Army aṭangin ṭanpuina an dawng tawh a; NGO pahnih - Caritas India leh Zoram Entu Pawl ṭangkawp leh bialtu MLA Nihar Kanti Chakma-in ṭanpuina an sem tawh bawk.
June thlaa Khawthlangtuipui lian vang hian Tlabung leh a chhehvel khaw hrang hrangah chênna in 700 chuang tuiin a chîm a, chênna in 100 chuang a chhiat avangin tun thlengin chênna in la nei lo chhungkaw eng emaw zat an la awm a ni.