Bawngkawn LC leh BCM an inrem hnai

Bawngkawn Brigade rama Baptist Church of Mizoram (BCM)-in biak-in an sak leh Bawngkawn mi ṭhenkhatin biak-in an vawm chhiat chung-changah Bawngkawn Local Council leh BCM, Bawngkawn-te chu a thuphungin an inrem nia thu dawn a ni.

Bawngkawn LC leh Bawngkawn BCM Koh-hran inrem thu hi social media lamah a darh a; Vanglaini palaiin a zawhfiahnaah Bawngkawn LC chairman H Lalduhkima chuan, "Inremna kawng zawngin kan inkâwm fo a, a thuphungin kan inrem a, mahse, felfai taka tih a la awm lo," a ti.

Biak-in vawm chhiat a nih hnua Bawngkawn BCM hruaitute'n Bawngkawn Police Station-a FIR an thehluh chungchanga zawhna chhangin H Lal-duhkima chuan, "FIR thehluh vangin Bawngkawn khawtlang hruaitute Court-ah koh kan la ni ngai lo," a ti a; Court-ah chuan BCM leh sorkar an inkhing zawk niin a sawi.

Bawngkawn LC Chairman chuan, Brigade ram chungchanga BCM leh sorkar inkhinnaah Bawngkawn LC-te Court-ah koh an nih ngai loh laiin, BCM biak-in awmna chu Bawngkawn khawtlang ram a nih tawh avangin thubuai ngaihtuahnaah Bawngkawn LC-te an lang ve turah ngaiin Court-ah lan ve an dil zawk niin a sawi a; "Court chuan inrem dan kawng zawng turin min ngen zawk a ni," a ti.

Bawngkawn BCM nen inremna tak tak an neih theih a beiseiawm em, tih zawhna chu H Lal-duhkima chuan, "Pathian thu thu a ni a, theih loh a awm lo," tiin a chháng.

Thu dawnna pakhatah chuan, Bawngkawn LC leh BCM-te a thuphunga an inrem dan chuan, tuna biak-in dinna chin zawng chu LC lamin an chang ang a, biak-in kawt záwl zawng chu BCM Brigade biak-in kawt záwl atana hman tur leh, biak-in ding lai aṭanga Brigade Field lam awihtlàn lamah Bawngkawn kâwn lam hawi zawnga biak-in sak theih BCM-in an chang dawn nia sawi a ni.

Brigade rama BCM biak-in sak thar, an la luah loh chu October 13, 2015 zan dar 7 velah Bawngkawn mi ṭhenkhatte'n a dinna ram chungchanga lungawi lohna vangin an khawih a, a bang leh tukverhte an vawm chhe nual. Hei vang hian BCM Bawngkawn Kohhran chairman Upa DR Lenghaia leh secretary Upa R Zosiamliana ten October 13, 2015 zanah Bawngkawn PS-ah FIR an theh-lut a ni.