Aizawl dist.-a zu dawr pali hrem a ni

Aizawl district-a zu dawr (vendor) pali chu dan kalha zu an hralh avangin thla thum chhung dawr hawng lo tura hrem a ni.

Excise & Narcotics department (END) hotute sawi danin, END-in zu zawrh phalna license a hrênsakte hi Lengpuia HP Wineshop, Vaivakawna Two Brothers Wineshop, Vaivakawn Zohnuaia Tyson Wineshop leh Bara Bazar chunga MAMCO Wineshop-te a ni.

Zu dawr palite hi thla thum chhung hrem phawt an ni dawn a, a hnuah dan an bawhchhiat leh chuan an license tihtawpsak thlenga hrem theih a ni. END hotute chuan, zu dawr neitute chu zu a hlâwma hralh chhuak tur an ni lo tih sawiin, zu dawr hrang hrangah END enforcement-te an duty vek tih an sawi.

END hotute sawi danin, zu dawr neitute'n END duty-te hriat loh hlana a rûka zu an hralh loh nan department-in dawr kalhna tur a lei a, joint lock system hman vek a ni. Dawr chu zingah END duty-te leh a neitute'n a rualin an hawng a, tlaiah pawh a rual zelin an khar ṭhin. Chuti chunga dan loa zu hralh ru an awm chuan dan anga hrem zel tur a nih thu an sawi a ni.

Tun dinhmunah Aizawl district-ah zu dawr 20 a awm a, khawtlang ngenna vanga dawr tihtawp tawh panga a awm. Zu zawrh phalna license nei, tun thlenga dawr la hawng lo mi pakhat a awm bawk.

July 17, 2017 thleng khan Aizawl district-ah zu lei phalna liquor card nei mi 35,311 an awm a ni.