SHG member-te'n thing phun

Mizoram State Rural Livelihood Mission (MzSRLM) hnuaia Sangau khuaa self help group (SHG) 12 member-te chuan, nimin khan Sangau kawtchhuah hmun pathumah hnatlangin kawng kamah thing eng emaw zat an phun a, thing phun tawhte an hung ṭhat bakah, a bul vel an sâm fai.

Hnatlangah hian Sangaua V/C pali chhunga SHG Village Organisation pali awm aṭangin mi 200 chuang an thawk chhuak a, Sangau aṭanga Saiha lam panna kawng, Lunglei lam panna kawng leh Saisihchhuah (India leh Myanmar inrina) panna kawngahte an hnatlang a; ei leh inte chu Sangau SDO(C) leh BDO Lalneihthanga Colney-in a tumsak a ni.

MzSRLM hi Sangau RD Block chhunga V/C 22 zinga V/C 17-ah ṭha taka kalpui mek a ni a, SHG 185 a ding tawh a; SHG 185 zinga 149-te hnenah bul ṭanna Rs. 2,500 ṭheuh pek a ni tawh. MzSRLM la kalpui mumal lohna V/C pangaah pawh kalpui thuai tum a nih thu an tarlang.