Chak zawka Smart City kalpui dan tur sawiho

Smart City hnuaia hmalakna chak zawka kalpui a nih theih dan tur ngaihtuahin, nimin khan UDPA minister Zodintluanga hoin a pisaah official-te an ṭhukhawm. Kum 5 chhunga India ram khawpui thlan bik changkang zawka thawm ṭhat tumna Smart Cities Challenge vawi thumnaah Aizawl tlan a ni.

Sorkar thuchhuah tarlan danin, Smart City-a Aizawl siam turin sor-kar laipuiin state sorkar hnenah kum 5 chhungin cheng vbc. 500 a pe dawn a; a thawh khatnaah cheng vbc. 200 pein, cheng vbc. 300 dang chu kum tin vbc. 98 zela ṭhenin a pe dawn a ni.

Smart City hnuaiah hian state tinte'n an hmalak dan tur ruahmanna an siam a; Mizoram sorkarin Aizawl khawpui, tunlai thiamna hmanga thawm ṭhat dan tur ruahmanna an siam chu meeting-ah hian an thlirho a ni.

Aizawl Smart City Plan hi hlawm lian pahnih - Area Based Development leh Pan-City Development tia ṭhen a ni.

Ruhrel lian tham awm sa chei mawi leh thawm ṭhat hna te, kawng siam te, mipui punkhawmna hmun ṭha zawk siam te, inkalpawhna kawng péngṭhuam chei te, mipui mamawh tur thil thar sak belh te, tui supply te, bawlhhlawh sawngbawl lam hawi te, mipui himna leh hriselna lam kaihhnawiha hmalak tum a ni.

Smart City kalpui tur hian Mi-zoram sorkar hnuaiah Company Act hnuaia inziak lut Special Purpose Vehicle (SPV) ‘Aizawl Smart City Limited (ASCL)’ din a ni dawn.

ASCL atan hian interim CEO leh Board of Directors ruat tur a ni a; Board of Directors chairman atan UDPA secretary Dr C Vanlalramsanga leh interim CEO atan UDPA joint secretary Vanlalmawia te rawt an ni. SPV siam tur hian Cabinet pawmpuina a ngai dawn.