Zirtiri College-in zirlai thar lawm

Zirtiri Residential Science College (ZRSC) chuan, nimin khan Vanapa Hall-ah kumina an college lut thar zirlai lawmna hun an hmang a, minister R Lalzirliana'n a hmanpui.

R Lalzirliana chuan, hlawhtling turin thuawihna, tawrhchhelna, hun vawn dik, taimak leh nun uluk a pawimawh tih sawiin, "Eng hna pawh thawk turin mithiam bik mamawh vek a nih tawh. Eizawnna kawng dap tur emaw, sorkar leh company-tea hna hmu tur chuan result neih ṭhat bakah, thiamna tak tak neih tel a ngai. A satliah tan beisei tur a váng tawh hle a ni," a ti.

Zirtiri RSC hi August 1, 1980-ah hmeichhia chauh luh theihna Zirtiri Women College tia din niin, June 28, 2000-ah science college-ah leh a ni a, science zirlai 580 an awm mek a ni.