KHAWTHLIR

AIDS do nan pe
UPC (NEI) North Mizoram District hnuaia Ladies Auxiliary Department (LAD)-te chuan HIV/AIDS dona kawnga hmalakna atan Mizoram State AIDS Control Society (MSACS) hnenah nimin khan Rs. 10,000 an hlan. HIV/AIDS dona tur sum inhlannaah hian District LAD president C Lalthangpuii'n ṭawngṭaina hun a hmang a ni.

Mibo zawng mek
Kiddy Lalramchhana (36) s/o K Liantuala, Dawrpui Jail Veng, July 15, 2017 tlai aṭanga a chin hriat loha awm chu khawtlangin an zawng mek. Thu dawn danin, mibo hi Dawrpui, Zarkawt, Electric Veng leh Chaltlang mite leh Hrangbana College zirlai leh thawktute'n an zawng tawh a; vawiin aṭang hian Central YMA ruahman angin Aizawl-a YMA branch hrang hrangte'n an zawng ang.

YMA branch thar
Khawlailung Branch YMA chu branch pathumah ṭhen a ni a, July 18, Thawhlehni khan YMA branch indang tharte thlahna leh branch thar hawnna inkhawm Khawlailung community hall-ah neih a ni. YMA branch thar pahnih - Khawlailung Dinthar Branch leh Khawlailung Bunghmun Branch-te chu Tuichang-ral Group YMA president R Lalremkunga'n a hawng a ni.

Half Way Home
Dinthar Veng khawtlang chuan ruihhlo ngaite enkawlna an din, Half Way Home-in kum 17 a tlin champha chu nimin khan an lawm a, bialtu MLA Lalruatkima'n a hmanpui. Half Way Home hi July 18, 2000-ah din a ni a, kum 17 a tlin champha lawmnaa khuallian Lalruatkima hian Home chu tlawhin, MLA fund aṭangin TV leh tuizem dahna siamna tur Rs. 1,50,000 a pe a, thawktute'n a ṭula an hman atan Rs. 2,000 a pe bawk.

ATM hawng
Aizawl Civil Hospital-a State Bank of India (SBI) ATM Booth thar chu nimin khan medical superintendent Dr. KL Remsanga'n a hawng. ATM dahna tur hi PWD-in cheng nuai khat vel sengin an siam a, a chhung hi SBI-in a chei thung a ni.