Aizawl-Lunglei-Tuipang kawng Zauh meka harsatnate sawiho

Land Revenue & Settlement (LRS) minis­ter Lalruatkima hoin nimin khan a pisaah sorkar hotute'n NH-54 Aizawl-Lunglei-Tuipang kawng­pui zauh meka harsatna awmte an sawiho. JICA Entitlement Matrix beh­chhanin Mizo­ram sorkar­in Mizoram puma hman tur guideline thar siam se, guideline chu meeting-ah enho ni se, an ti.

Ṭhutkhawmah hian LRS department hotu te, district tina DC/additional DC/settlement officer leh revenue kaihhnawih official-te bakah, National Highways & Infrastructure Development Corpo­ration Limited (NHIDCL) hotute an tel.

Tarlan danin, NH-54 kawngpui zauh mekin a hrût khaw eng emaw zatah chenna in chhuahsan ngai te, eizawnna kalsana hmun danga eizawnna thar dap leh ngaite an awm. Chu'ng mite tan chuan chhawmdawlna leh inbenbelna tur (reha­bilitation & resettlement) tih a ngaih dawn avangin district tin hotute'n uluk takin zirchianna an kal­pui a; zirchianna (assessment) chu Mizo­ram sorkar dan, Right to Fair Compen­sation and Transparency in Land Acquisition, Rehabilitation & Resettle­ment Act, 2013 hmanga neih a ni.

Zirchianna aṭanga an thutlukna chu LRS deptt. chuan NHIDCL-ah thehlutin, NHIDCL-in Ministry of Road Transport and Highways (MoRTH)-ah a thehlut leh a; MoRTH chuan NHIDCL hnenah JICA project a nih angin assessment chu JICA Entitlement Matrix behchhana chhût turin a hriattir a ni.

Ṭhutkhawmah hian Right to Fair Compen­sation and Transparency in Land Acquisition, Rehabilitation & Resettle­ment Act, 2013 leh JICA Entitlement Matrix inan lohna leh district tina harsatnate sawiho a ni a; JICA Entitlement Matrix inkaihhruaina anga kalpui a nih dawn avangin rehabilitation leh resettlement dawng thei tur zat leh an sum hmuh zat tur pawh a danglam thei dawn tih an sawi.

JICA Entitlement Matrix behchhanin Mizo­ram sorkarin Mizoram puma hman tur guideline thar siam se, guideline chu meeting-ah enho leh ni se, tiin an rél a ni.