Ruihhlo Do Pawl din turah Ruahmanna peih a ni tawh
YMA Central Executive Committee (CEC)-in Central YMA hnuaia Ruihhlo Do Pawl din tura ruahmanna siam tura a ruat CYMA Kumpuan Sub-Committee chuan ruahmanna an peih tawh.
CYMA Kumpuan Sub-Committee hruaitute hnen aṭanga Vanglaini thu dawn danin, Ruihhlo Do Pawl din turin ruahmanna peih a ni tawh a, YMA CEC-ah thehluh a ni. CEC chuan ruahmanna siamte an sawiho leh ang.
August 8, 2022 zana CEC ṭhukhawm chuan Central YMA hnuaiah Ruihhlo Do Pawl din an rél a, ruahmanna siam turin CYMA Kumpuan Sub-Committee-te an ruat a ni.
Central YMA hruaitute CYMA Committee Room-a ṭhukhawm chuan, August 5, 2022 zana Aizawla YMA branch office bearer-te intawhkhawm an thlir lêt a; YMA branch hruaitute thusawi leh duh dante thlirin, "Ngun taka sawiho a nih hnuah CYMA hnuaiah Ruihhlo Do Pawl din leh ngei ni se," an ti a ni.