India ram pumah HIV/AIDS donaa thawktute'n lungawi lohna an lantir
India rama HIV/AIDS donaa thawkte chuan hlawhbi siamṭhat chungchangah nimin khan ram pumah lungawi lohna an lantir a, Mizorama thawkte pawhin district hrang hrangah lungawi lohna an lantir.
India ram puma HIV/AIDS donaa thawktute'n nimina lungawi lohna an lantir hi Mizorama thawktute pawhin an lo zawm ve a, district hrang hrangah lungawi lohna an lantir a ni. Vawiin hian India ram pumah state aiawh thlan chhuahte leh NACO leh Health & Family Welfare Ministry aiawhte an inbe dawn a; inbiaknain rah ṭha a chhuah loh chuan tiamchin awm loa nawrh tum a ni.
Mizoram State AIDS Control Society (MSACS) Staff Welfare Committee tarlan danin, an hlawh chu October 2013-ah ennawna siamṭhat a lo ni tawh a, hlawhbi siamṭhat leh turin an nawr reng a, kum riat hnu, August 3, 2022 khan National AIDS Control Society (NACO) chuan hlawhbi thar a siam leh ta a ni.
An hlawhbi thar chu tunlaia ni tin mamawh châkkhai man pung zel nen ngaihtuahin a beitham hle tih sawiin MSACS Staff Welfare Committee chuan, "Kum nga aia rei lo thawk thawhte ngaihsak an ni miah lo. HIV/AIDS lama thawktu sang chuang chu kum lamah hna dang zawng thei tawh lo khawpin kum 18 chuang rinawm taka lo thawk tawhte an ni a, heng tawnhriat nei ngah zawk thawktute ngaihsak miah loa NACO-in hlawhbi a siam hi kan ngaihdan a ni lo em em a ni," an ti.
MSACS Staff Welfare Committee chuan, vawiina thuneitute inbiaknain rah ṭha a chhuah loh a, tiam chin awm loa an nuar a nih chuan NACO leh HFW Ministry mawh a nih tur thu an sawi a; an nuar zui a nih chuan HIV/AIDS lam kaihhnawih hna reng reng thawh a ni dawn lo tih an tarlang.
MSACS Staff Welfare Committee chuan, NACO hnuaiah India rama district damdawi-in, thingtlanga damdawi-inte leh medical college hnuaiahte HIV/AIDS donaa thawktu mi 25,000 vel an awm mek a ni.