KHAWTHLIR
MLA-in lirthei pe
Vohbik naupangte luhna - Shining Star Special School, Republic Veng tan nimin khan Aizawl South-I bialtu MLA C Lalsawivunga'n lirthei (Eco Van) a pe. C Lalsawivunga chuan, Shining Star Special School kaltlangin zirlai naupangte'n Pathian malsawmna an chan ngei a beisei thu sawiin, "He rawngbawlna hi Lal Isua duh záwng rawngbawlna a ni," a ti. Sikul enkawltute'n zirlaite hruaina atana lirthei an mamawh thu a hnena an thlen chu bawhzuiin, MLA hian a fund aṭangin cheng nuai 5 chuang sengin lirthei hi a lei a ni.
BLO training
Electoral roll thar siamna tura ennawnna, Special Summary Revision of Electoral Roll 2023 atana inpuahchahna kal zelah nimin khan Champhai District Election Office chuan IPR auditorium-ah booth level officer (BLO) tan training an buatsaih a, district election officer (DEO) James Lalrinchhana, bawrhsapin a hmanpui. District master trainer Esther Leihang, AERO leh data entry operator J Lalthanmawia ten thil pawimawhte an zirtir.
Lehkhabu tlangzarh
C Lalhluna ziah 'Mizoram thing leh mau, nungchate humhalhtu ropui VL Bela' (The Great Conservator of Flora and Fauna of Mizoram) tih lehkhabu chu nimin khan Environment, Forest & Climate Change minister TJ Lalnuntluanga'n MPSOA conference hall-ah a tlangzarh. Minister chuan, thing leh mau leh a chhunga chêng ramsate humhalh chu khawvel ram hrang hrangte buaipui lian ber a nih thu a sawi.
Chesual ruang hmu
Nimin chhun dar 11:32 khan Tlawng luia Muvanlai lí-ah mipa ruang hmuh a ni a; chhe deuh tawh mah se, a thawmhnaw hak aṭangin August 2, 2022 tlaia Sihhmui leh Lengpui inkara Tlawng lei bula lirtheia chesuala Tlawng luia tla lut zinga mi, Lalfakzuala Chenkual (39), Chaltlang Lily Veng ruang a ni tih hriat a ni. Ruang hi Lengpui damdawi-inah endik a ni a, nizan dar 7 khan an inah vui a ni. Lalfakzuala fapa Malsawmkima (10) ruang chu August 17 khan Changsil kàiah hmuh a lo ni tawh bawk.