House-a lehkha hmang loa hmalakna National e-Vidhan Application zirho

Assembly deputy speaker Lalrinawma chuan nimin khan Assembly Annexe banquet hall-ah Mizoram Legislative Assembly member-te tana ruahman National e-Vidhan Application (NeVA) zirhona a hawng.

Lalrinawma chuan, NeVA chu India rama state leh union territory zawng zawng hman tura ruahman a nih thu a sawi a, "Tunah hian state pali-ah hman ṭan a ni tawh a, hmarchhakah chuan Nagaland-ah hman ṭan tawh niin, Mizoramin kan hmang ve thei tur hi a lawmawm hle a ni," a ti.

NeVA project chu sorkar laipui sum hmanga kalpui a nih thu sawiin Lalrinawma chuan, "State share (state sorkarin a tum tur) 10% a ni a, DPR thehluh a nih hnuah Mizoram tana sanction amount chu Rs 8,70,84,750 a ni. Tunah hian first instalment-a utilisation certificate thehluh tawh a ni a, second instalment beisei mek a ni," a ti a; NeVA chu MLA zawng zawngin ṭangkai leh hlâwk taka an hman theih nan duhsakna a hlan.

NeVA hi ram roreltuteah lehkha hman ngai lo (paperless) tur leh digital hmanna tura hmalakna a ni a, training hian ni nga a awh ang. NeVA website chu National Informatics Centre (NIC) siam a ni a, Ministry of Parliamentary Affairs enkawlna hnuaia awm a ni. NeVA thupui chu 'One nation, one application' tih a ni a, India rama legislature-te huang khata pawh khawm tumna a ni.

NeVA hmang hian thil pawimawh chi hrang hrang - hriattirna, bulletin, rules of procedure, list of business, session zawhna leh chhanna, bill, House-a paper pharh, committee report leh thil dangteah lehkha hmang kher loa kalpui tum a ni a; Assembly zawhna leh a dangte pawh NeVA hmangin thehluh theih a ni ang.

MLA-te dawhkân tinah touchscreen vuah vek tur niin, ipad pek vek an ni dawn a; House-ah lehkha sem awm tawh loin, member-te'n an duh ang an hmet chhuak tawh dawn a ni. House-a MLA-te thusawi rei zawng pawh record theih a ni dawn bawk.