SEDP-ah Rs 3,00,000 sem turin phût

Congress party ṭhalai, Mizoram Pradesh Youth Congress Committee (MPYCC) chuan thuchhuah siamin, MNF kaihhruai sorkar chu inthlan hmaa an intiam angin SEDP hnuaiah Rs 3,00,000 sem turin an phût tih an tarlang.

MPYCC chuan, MNF sorkarin an term tàwp dawn hnaih lama SEDP hawnna hun hmang a, SEDP ṭanpuina sum sem ṭan an tumah a dawngtu turte an lawmpui thu leh duhsakna an hlan thu an tarlang a ni.

Rs 3,00,000 tiamtute'n Rs 50,000 sem an tum leh si leh a thawh khatnaah Rs 25,000 sem an tum chu an intiamnaa an din lohzia leh mipui an hmuhsitzia tichiangtu a nih thu sawiin MPYCC chuan, "MIP project an kalpui tawh ang mai a, Rs 30,000 pek tumin Rs 7,000 an sem ang vela hmasawnpui tham ni mang si loa sum sem chhuah an tum hi ṭha lo kan ti hle a ni," an ti.

Congress ṭhalaite chuan, Lalsawta kaihhruaina hnuaiah Congress party an tho chhuak leh mek nia sawiin, "Mizoram mipui tan sorkar ṭha siam ngei turin kan inbuatsaih chho mek," an ti a; party hrang hranga ram veitute leh sorkar ṭha siam duhtute chu thurawn pe tur leh finchhuah turin an sáwm a ni.