Sialhâwk lakhuihthei Dubai-ah zuar

23rd August, 2022

Sialhâwk khuain lakhuihthei an thar zinga kg. 200 vel Dubai, UAE-a thawn thlak chu Dubai khawpuia Lulu Hyper Market, Al Qusais-ah zawrh chhuah mek a ni.

Thu dawn danin, Sialhawk lakhuihthei an zawrhna LuLu Hyper Market hi United Arab Emirates (UAE) rama dawr lian tak a ni a, sorkar hotute aṭanga Food Safety Standard paltlang vek zuar leh trade licence mumal tak nei a ni.

Tarlan tawh angin, Sialhâwk khaw mite'n lakhuihthei an thar zinga quintal hnih chu Dubai-ah thawn a ni a, August 19, 2022 zing khan Horticulture directorate kawt aṭangin deputy chief minister Tawnluia'n a vailiam a ni.

Lakhuihthei Dubai-a thawn hi Fair Exports Pvt.Ltd-in an buaipui a, Mumbai Airport-ah kg. khat Rs 30-in an leisak a, Dubai-ah an phur thla a ni. Horticulture secretary K Lalthawmmawia chuan, lakhuihthei Dubai-a thawn chu enchhinna a nih thu a sawi a, "An duh záwng tak a nih chuan hlâwk zawkin chhunzawm a ni dawn. A bul ṭan nan hloh pawh huamin hma kan la a ni," a ti.

Fair Exports hian nimin khan Sialhawk Pineapple Grower Society hnenah lehkha thawnin, lakhuihthei kg. 300 thawn belh turin an chah a; an leisakna man (rate) pawh tipungin, kg. khat Rs 120-a an lei tur thu an hriattir a ni.

Dubai dawr liana Sialhawk lakhuihthei zawrh chungchang hi chief minister Zoramthanga chuan nimin khan social media-ah a tarlang a, "Dubai lama zawrh tur Sialhawk lakhuihthei kan thawn thlâk tukin zinga zawrh tura phochhuah a ni hman hi hmasawnna ropui tak a va ni em! Pathian hnenah lawmthu awm se. Heng thil hlawhtlinna tura theihtawp chhuahtu deputy CM Pu Tawnluia, Horticulture department-a thawktu zawng zawngte leh Commerce & Industries department thawktute chungah lawmthu ka sawi e... Kan lakhuihthei chíngtu zawng zawngte ka lawmpui che u a, in tan Mizoram sorkar chuan kawng a sial zel dawn," a ti.

Ruahman awm sa ang chuan, Dubai-ah hian lakhuihthei kg. 900 thawn leh tum a ni a; Doha, Qatar leh Bahrain-ah pawh enchhinna atan kg. 740 ve ve pek tum a ni. India ram chhunga state dangah lakhuihthei pum 30,000 vel an thawn chhuak tawh bawk.