MPCC-in MADC-a an MDC-te an hrem lo; ADC-a Congress party-in lawmthu an sawi

Tarlan tawh angin, May 5, 2022-a MADC inthlanpui result May 9-ah puan a ni a, party mala sorkar siam thei an awm loh avangin MNF leh Congress MDC-te chuan sorkar inṭawm an siam a ni. Mahse, sorkar inṭâwm siam chu MPCC hriatpui loh a nih avang leh MPCC-in MADC-ah sorkar siam turin BJP leh MNF thawhpui loh an rêl tawh avangin MPCC chuan insawifiah tura hriattirna show cause notice pek an rél a ni.

MPCC thutlukna chu an president Lalsawta'n May 17, 2022-a press statement a siamah a tarlang a, "Party duh dan hre reng chunga MADC-a kan hotute leh kan MDC-te'n sorkar an siampui lui mai hi kan party chuan a ngai thutak hle a. Loh theih lohin 'Show cause notice' kan pek a ngai dawn," a ti.

July 15, 2022-a Congress Bhavan-a inkhawmah pawh Lalsawta chuan MADC chungchanga MPCC PAC thutlukna a puang leh a, "July 12, 2022-a PAC meeting chuan Disciplinary Action Committee-in a zirchianna leh ṭul ang ang a rawn thehluh kan sawiho. MADC-a Congress MDC palite'n Congress led government siama MNF an thawhpui hi PAC-in a remtih loh a nih avangin PAC hi kan dinna a la ngai reng a ni," a ti bawk.

MADC-ah hian Congress MDC pali leh MNF MDC pakuate'n sorkarna an siam mek a, Congress MDC-in chief executive member an chang a, MNF-in deputy CEM an chang thung.