Party president leh CM nihna chelh kawp kan nei dawn lo - ZPM Treasurer

ZPM treasurer C Lalṭanpuia chuan nimin khan an party pisaa inkhawmah thu sawiin, ZPM-in sorkarna an chan chuan party president leh chief minister nihna chelh kawp an neih dawn loh thu leh, khawpuiah mar taka an kal laiin, tunah chuan thingtlangah ZPM thlí a tleh tawh zawk thu a sawi.

C Lalṭanpuia chuan, ZPM chu khawpuiah mar takin an kal zel tih sawiin, "Chutih laiin, kan harsatna ṭhin thingtlang lamah khawpui aiin ZPM thli a tleh tawh zawk a, chak leh zuala kal turin a nawrin min rawn nawr a ni ber," a ti.

Kalphung thar, mipui sorkar an din hunah party president leh chief minister nihna chelh kawp an nei dawn lo tih sawiin Lalṭanpuia chuan, "Party leh sorkara nih sang ber chelh kawp kan neih ṭhin avangin sorkar ṭha dinna turah harsatna nasa tak a thleng ṭhin. Tunah chuan duh ang thálin an tâl a, kan intlawnsiak luih luih a, democracy ramah dictator ang maia an chêt theih avangin mipuiin an tuar ṭhin," a ti a, mipuiah rilru ṭha lo tak a tuh a, MLA leh minister thlengin mipuiin an intlawnsiak ṭhin thu a sawi.

ZPM Treasurer chuan, an party chuan a takin an policy an kalpui dawn tih sawiin, "Inziah ṭhatsiakah kan tel ve lo," a ti a; ZPM hruaitu pahnih Lalduhoma leh K Sapdanga chungchang sawiin, "Dik lo takin party dangte'n an ngaihdan leh duh dante sawiin, min beih nan tak an hmang ṭhin a, mahse, heng zawng zawng hi kan tan malsawmnaah changin, ZPM boruak vuak lenna hmanruaah a chang zel. An beihna hian inṭhian ṭhatna leh thawh dunna ṭha zawk a thlen a ni," a ti.

ZPM inkhawmah hian president Lalliansawta'n an party zawm thar a lawm lut a; ram rorelnaah Pathian ram tun din an tum thu a sawi a ni.