Hripui vei enkawl lai a tlahniam hret hret

August 21, Pathianni khan Mizoramah Covid-19 vei mi 55 hmuh chhuah a ni. Nimin khan hripui vei dam tawh mi 114 chhuahtir an ni a, Covid-19 vanga thi an awm lo a; hripui vei enkawl lai mi 590 awmin, a tlahniam hret.

Pathiannia Covid-19 positive hmuh chhuah mi 55-te chu mipa 27 leh hmeichhia 28 an ni a, RAT hmanga hmuh chhuah vek niin, swab sample endik zat 211 aṭanga positivity rate chu 26.07% a tling.

District tina hmuh zat chu - Lunglei district-ah mi 31, Kolasib-ah mi pariat, Saitualah pasarih, Champhaiah pali, Aizawlah pathum leh, Serchhip leh Mamitah pakhat ve ve a ni a; August thla chhungin mi 3,305 hmuh chhuah a ni tawh.

Nimin khan hripui vei dam tawh mi 114 chhuahtir an ni a, district tina chhuak zat chu - Lunglei district-ah mi 29, Champhaiah mi 22, Aizawl leh Siahaah 11 ve ve, Saitualah pakua, Serchhip, Lawngtlai leh Hnahthialah panga ṭheuh, Mamitah pali leh Kolasib-ah mi pathum an ni.

IDSP record angin, Mizoramah Covid-19 vei 2,36,105 hmuh chhuah a ni tawh a, mipa 1,09,922 leh hmeichhia 1,26,183 an ni a, mipa aiin hmeichhia 16,261-in an tam zawk. Nimin tlai dar 5 thleng khan mi 2,34,798 (99.45%) chhuahtir an ni tawh a, mi 717 (0.30%) thi tawhin, enkawl mek mi 590 (0.25%) an awm.

Kum 2011 chhiarpui angin, Covid-19 vei hmuh tawh 2,36,105 chu state mipui zat aṭangin 21.52% a tling a, India rama state zingah a sang ber. Mi 1,000 zelah positive 215 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.