MBBS-BDS Mizoram quota-a Chakma telh duh loin zirlaite an pung khawm

MBBS leh BDS counselling neih turah Chakma palite dan tumin MZP bultumin Aizawla zirlaite chu nimin khan Higher & Technical Education (HTE) Technical Wing pisa kawtah an pungkhawm. Police leh zirlaite an innawrnaah hliam an awm nual a, ngaihtuah awm lutuk erawh an awm lo. Counselling chu kaltlangpui ni mah se, counselling neihpui tawh ṭhenkhat (Chakma pali tiamin) te chu counselling ti ṭha leh tura tih an ni.

MZP hruaitute ṭhenkhat chu zing dar 9 velah HTE Technical Wing pisa kawt, Chaltlangah an kal khawm. NEET kaltlanga Mizoram quota-a MBBS leh BDS zir thei tur Chakma zirlai palite leh anmahni ṭawiawmtute chu prison van hmangin Technical Wing pisa panpui an nih hnuah, police venhimna hnuaiah counselling ti tura hruai luh an ni.

Zirlaite chuan chawhma dar 10 velah Technical Wing pisa kawtah lirthei kal tur an dang ṭan a, police pawh ṭhahnem tak an awm. Zirlaite chu 'Mizote chanvo hnam dangin an chan an remtih ngai dawn loh' thuin an au rual a, buaina chhuak a awm lo. Chawhma dar 10:30 velah zirlai rawn kal belh turte chu Police-in Transport pisa bulah an lo dang a, zirlaite nen hian an in nawr a ni.

Police hian zirlaite chu tiangin an vua a, zirlaite'n lungin police an vawm ve thung. Police lamin tear gas an kah hnuah zirlaite chu an ûm darh a, zirlai leh police zingah hliam an awm a, police pakhat chu lungin a hmaiah a fuh avangin damdawi-inah hruai a ni.

Minute 20 hnuah velah zirlaite hian Technical Wing pisa an pan leh a, police-te chuan Transport pisa bulah lo dang lehin buaina a chhuak zui lo. MZP hruaitute leh HTE department hotute chu secretary Benjamina hoin an inbia a, an inbiak lai hian zirlai 23-te chu counselling tihpui an ni tawh a, Chakma zirlaite chu counselling pek zawh vek an ni tawh.

Zirlaite chu Transport pisa bulah inhmuhkhawm lehin an aurual a, chumi hnuah sorkar hotute thu ngaichâng turin an ṭîn darh a ni.

Nimina counselling chu sût an phût thu te, sût a nih loh chuan vawiinah total bandh huaihawt a nih tur thu te, kum 2014-a an buai ṭumin (September 23, 2014-ah) HTE minister R Romawia'n 'Buaina a awm leh a nih chuan ka báng ang,' tia a sawi avangin a lo intiam tawh anga báng tura an phût thu te, minister of state Dr BD Chakma báng tura an phût thu te, Chakma ho chu ram Bangladesh-a haw tura an phût thutein an au rual.

MZP hian Chakma zirlai counselling neihpui tawh chu sût phûtin vawiin zing aṭangin tiam chin awm loa total bandh huaihawt an tum a ni. Nimin tlaia sorkar hotute nen an inbiak hnuah, tlai dar 6 velah an inrem a; inrem hnuah MZP hruaitute chu an ṭhukhawm leh a, bandh huaihawt an tum chu an ṭhulh an rêl leh a ni.

MZP leh sorkar inrem dan chuan, nimina counselling tihpui tawh Mizo zirlaite chu NEC hnuaia Mizoram quota-a mi an nih avangin, admission ti nghal thei turin an ti. Admission ti thei tura an tihte chu - RIMS, Imphal-ah zirlai pasarih, NEIHGRIMS, Shillong-ah zirlai pathum, Dibrugarh-ah zirlai pakhat an ni a; Chakma zirlai, counselling ti tawhte erawh an tel lo.

NEC hnuai ni lo, Central pool hnuaia kal turte erawh chu seat allotment hmuh a la ni lo a, seat allotment hmuh hunah counseling neih leh tur a ni ang. Counselling nei ṭha tur zingah hian Chakma zirlai palite hi an tel.

Chakma zirlai counselling-a kalte chu - palina Darhshan Chakma s/o Sunity Ranjan Chakma, pakuana Nibir Chakma s/o Joy Kumar Chakma, 17-na Mini Chakma d/o Pritimoy Chakma leh 23-na Nibhir Tangchangya s/o Kamal Kumar Tongchangya te an ni. Anni pali bakah hian Category-I ah Chakma dang pahnih tling an awm a, counselling-ah an kal lo.

Kumin hian Mizoramin MBBS seat 38 leh BDS seat 10 a nei a, Chakma zirlai pahnihte counselling-a kal lote chuan MBBS leh BDS an chang pha lo ve ve. Hnam dang pakhat, Category-I a awm erawh counselling-ah a kal lo.