India President thar Ram Nath Kovind

India ram President 14-na atan rorel lai, National Democratic Alliance (NDA) candidate Ram Nath Kovind chu hneh taka thlan tlin a ni.

President thlanna vote tlate chu nimin khan chhiar a ni a, Ram Nath Kovind hian a khingpui eptu candidate inṭâwm Meira Kumar chu a hneh.

President thlannaah hian MLA 4,120 leh MP 776 ten vote an thlak a, vote 77 a thi. NDA candidate Ram Nath Kovind hian vote tla aṭanga 65.65% hmuin a tling a, a vote hmuh zat chu 2390 niin, a vote hmuh hlut zawng hi 7,02,044 a ni. Eptu pawl candidate Meira Kumar chuan vote 1,844 hmuin a vote hmuh hlut zawng chu 3,67,314 a ni.

Ram Nath Kovind hi Dalit niin, October 1, 1945-ah Kanpur Dehat, Uttar Pradesh-ah a piang a, May 30, 1974-ah Savita Kovind nen inneiin, fapa pakhat leh fanu pakhat an nei. Thiamna lamah B.Com a ni a, law graduate (LLB) a ni bawk.

Kum 1977-1979 chhung­in Delhi High Court-ah Central Goverment Advo­cate a ni a, kum 1980-1993 chhungin Supreme Court-ah counsel a ni bawk. Delhi High Court leh Su­preme Court-ah hian kum 16 chhung a thawk hman.

Kum 1991-ah BJP a zawm a, kum 1998-2002 chhung khan BJP Dalit Morcha president leh All-India Koli Samaj president a ni. BJP national spokesperson pawh a ni tawh a, Derapur-a an chhungkaw in chu RSS tan a pe a ni.

Uttar Pradesh Assem­bly inthlanah Gha­tapur leh Bhog­nipur bialah a chuh tawh a, a tling zo lo ve ve. April 1994 khan Uttar Pra­desh-a Rajya Sabha mem­ber atan thlan a ni a, a záwna term hnih chelhin, March 2006 thleng member a ni.

August 2015 khan India President-in Bihar Governor atan a ruat a, August 16, 2015-ah Patna High Court acting Chief Justice Iqbal Ahmad Ansari chuan Bihar Governor 36-an ni turin a la lut. NDA sorkarin President candidate atana a ruat hnu­ah Bihar Governor a nihna aṭangin a báng nghal a ni.