YMA-in Chakma teltir an duh lo

Central YMA chuan nimin khan thuchhuah siamin, kum 2017-a Mizoram quota-a MBBS leh BDS zir tur thlannaa Chakma panga leh vai pakhat thlan tel an ni chu an hriatthiam loh thu an tarlang.

CYMA chuan, Mizo­ram quota-a MBBS leh BDS zir tur thlan chung­changa Category-I a ram leilung fate chanvo chang ve tura ram leilung fa ni lote chhiar tel an nia sawi­in, paw an tih thu an sawi a, "Mizo fate chanvo chhuh­saknaah kan ngai," an ti.

Mizoram quota-a MBBS leh BDS zir tur thlannaah counselling nei tura MZP hmalakna ngaichang loa sorkarin hmalak tlang a tum chu pawi an tih thu sawiin CYMA chuan, "Hnam dangin Mizote chanvo dik tak an chuhpui theih loh nana a ṭul anga ngaih­tuahna seng nawn turin Mizoram sorkar kan ngen a ni," an ti a; Police-te'n zirlai pawisawi lote chunga kut an thlak ṭhin chu pawi an tih thu leh, hun lo kal leh zel turah hnam rilru pua hna thawk tura an beisei thu an sawi.

CYMA chuan, ram leilung fate humhalh nana MZP hmalakna chu Central YMA-in an thlawp tlat tih sawi­in, "NEET 2017 tling zingah Mizoram quota hnawhkhat tur hian Mizofate ngei thlang turin sorkar kan beisei. Chakmate kawng lo sialpuitu Dr B.D. Chakma, minister of state thil tih dan pawh kan dem tak zet a ni," an ti.