Eptu MLA-te'n Mamit kawng en

MNF leh MPC MLA-te telna, Mizoram Democratic Alliance (MDA) member-te chuan July 19, 2017 khan Mamit lama kawngpui chhia-te a hmunah kal chilhin an enfiah.

Mamita kal MDA member-te hi leader Vanlalzawma, Lalruatkima, Lalthanliana leh Lalrinawma te an ni a, MNF ṭhalai hruaitute'n an ṭawiawm. MDA MLA-te chuan, Mamit kawng chhia chu mipuiin harsatna an tawh zel loh nan a chhe zual laite a rang lama thawm ṭha turin sorkar an phût a ni.

Opposition group leader Vanlal-zawma chuan Mamit khaw panna kawng chu kum 1980 bawrchho vel ang mai khan a chhe leh tawh nia sawiin, "Sumo service a chuang tur pawhin 'kawng laka motor tan changa namchhuak thei tur pa chak deuh lo chu driver-ten an phur duh lo' tia fiamthua an sawi ṭhin kha a tak tak a nih ngei a rinawm a ni," a ti.

Lalruatkima pawhin thu sawiin, "Mamit kawng chhia bakah Zoram chhung hmun hrang hranga kawngchhiatzia hi sawichhuah pawh ngai kher loin kan hre vek awm e," a ti a, Mizoram kawng a chhiat em em laiin, Assembly House-a eptu MLA-ten kawng chhiat thu leh kawng hi siamṭhat thuai duhna resolution an put luh chu hnawl a nih thu a sawi.

Mizoram rorelna a chiri thu sawiin MDA member Lalrinawma chuan, "Kan ram rorelna khawlsang ber Assembly House-a Finance Minister meuhin a pharh CAG report, member ten lungrual taka kan passed ngei pawh a dik lo an ti a ni. Assembly House-a pharha passed vek tawh an pawm lo thar leh ta thut te hi a mak hle a, eng sorkar nge maw ni le tih mai awl tak a ni," a ti.

MPC MLA Lalthanliana chuan rorel lai mek Congress party chu a phak ang tawka zir chian thu sawiin, chhim lamah chuan an tlahniam tawh hle a niin a sawi.

MDA MLA-te hian tun hnaia Sumo service pakhatin motor hnunglama thu ziak tar vanga a motor document pawimawh hrensak service chhunzawm tir loh chungchangah Mamit DTO H Lal-hmingliana chu office-ah an tlawh nghal a, DTO hian kha thil thleng kha ama thua ti a nih loh thu leh chunglam atanga thupek vanga ti a nih thu a lo hrilh a ni.