Silai licence bu thar tlangzarh

Ministry of Home Affairs-in thuchhuah a siam hmanga Mizoram sorkarin silai licence awm sate a bu thara thlak vek tura a tih ang-in, Champhai district-a silai licence bu thar siam chu nimin khan DC conference hall-ah Champhai DC Vanlalngaihsaka'n a tlangzarh.

Sorkar thuchhuah tarlan danin, sorkarin Arms Rules 2016 tlawhchhana thuchhuah a siam anga mi pakhat tan silai pathum neih phal sak a ni a, silaite chu licence bu tharah ziak luh vek tawh tur a ni.

Silai licence nei zawng zawngte'n an licence leh passport size thlalak pakhat kengin August 31, 2017 thleng thlak theih hun hawn a ni a, hun tiam chhunga tifel lote'n harsatna an tawk a nih pawhin Champhai district thuneitute chuan mawh an phurh loh tur thu an sawi.