Enquiry Commission report an hâl

MPC leh ZNP ṭhalaite chuan thuchhuah inṭawm siamin, Nalanda Institute of Advance Studies (NIAS), Kolkata-a Mizo zirlai 32 tirh chungchang chhuitu Enquiry Commission-in MLA Lalrinmawia Ralte leh T Sangkunga te an fihlim anga a chhui chhuak chu Mizo mipui thamlohna leh hmuhsitna lian taka an ngaih thu an tarlang. Enquiry Commission report chu nimin khan an hâl.

MPCY leh ZNP ṭhalai chuan, LEIT minister hlui Lalrinmawia Ralte leh Mizoram Youth Commission (MYC) chairman hlui T Sangkunga te chu NIAS-a zir tur Mizo zirlai thlan chungchang avang-in báng turin an phût lo tih an sawi.

Party pahnih ṭhalaite'n Lalrinmawia Ralte leh T Sangkunga te báng tura an phût chhan zawk an tarlante chu - NIAS zirlaite an zirna tur institution en chiang hmasa loa an tirh vang te; zirna in lem a lo nih vanga zirlai mang-angte ngaihsak zui an nih loh vang te; MoU an ziah zawh hnu lawka kum thum zir man cheng nuai 128.20 vawi leh khata an pek tlak nghal vek vangte leh, Labour Welfare Board fund dik lo taka hmanga ngaih an nih vangte a ni.

NIAS avangin BJP, MPC leh ZNP ṭhalaite'n Aizawlah poster an tár a, ZNP ṭhalaiin MYC Chiarman pisa an kalhsak tih sawiin an thuchhuah chuan, "MNF party-in báng tura nawrin an pisa kai tur an dang a nih kha. Opposition party-te’n báng tura kan nawr chhan lo zawk Enquiry Commission-in finding an rawn nei daih mai hi nuihzatthlak kan ti a, chuvangin, Enquiry Commission report copy hi kan hâl a ni," an ti.

PRISM pawhin thuchhuah siamin, Enquiry Commission-in NIAS chungchanga Lalrinmawia Ralte leh T Sangkunga te chungchang a hmuhchhuah dan chu mak an tih thu an tarlang a, "Mipui hlauhthawn rûk ang ngeiin a chhuitute'n an chhuina mipuiin kan han hriat leh meuh chuan sum hman dan lampang reng reng lang loin, NIAS-a zirlai 32 thlannaa a hun laia Minister leh MYC Chairman-te direct-a an inrawlh loh thu a rawn lang ta daih a, a mak hle a ni," an ti.