Hakha mite'n ṭanpuina Rs. 15,02,921 pe

Hakha Rescue Committee (HRC), Myanmar-in June thlaa Mizorama tui-lian tuarte chhawmdawlna tur Hakha leh Thantlang vela an khawn khawm Rs. 15,02,921 chu nimin khan Central YMA hruaitute hnenah an hlan.

Chawmdawlna inhlanna inkhawm hi Central YMA pisaah neih a ni a, tuilian tuarte ṭanpuina sum YMA hnena hlan tur hian Hakha aṭangin HRC aiawh mi panga, Hakha Post chanchinbu aiawh pakhat, Chinlan Post chanchinbu aiawh pakhat, Chin Youth Organisation (CYO) aiawh pakhat, UPC pastor pakhat, artist pahnih leh driver pahnih nen, an vaiin mi 13 Mizoramah an rawn kal a ni.

Hakha, Myanmar aṭanga rawn kalte hi Central YMA hruaitute chuan Aizawl châwmtu tui lakna Tlawng lui Reiek kâi te, Hunthar Veng leh Saron Venga lei min leh tlahniamte an enpui a ni.

Tuilian tuarte chhawmdawlna atan CYMA huaihawtin YMA branch hrang hrangte'n an huam chhungah vehbûr an khawn mek zel a; YMA branch ṭhenkhat leh pawl leh mimal eng emaw zatin CYMA hnenah an hlan tawh. Chu'ng zingah chuan Young Paite Association, Churachandpur, Manipur-in an pek Rs. 1,53,120 leh buhfai ip 183 te, Mandalay Mizo Culture & Literature Association-in an pek Rs. 20,000 te, Mizo Professional Footballer Association-in an pek Rs. 1,18,462-te a tel.