KHAWTHLIR

Health camp
Zoram Entu Pawl leh Caritas India-te chuan nimin khan Tlabung Branch YMA Rûnah health camp an buatsaih ṭan a, Tlabung leh a chhehvel khuaa mi 200 vel an inentir. Health camp hi tun hnaia Khawthlangtuipui lian tuarte chhawmdawlna tura hmalakna chi khat a ni.

Rising Day lawm
Saiha College chuan nimin khan an college hall-ah an din champha an lawm. Saiha College rising day lawm nan hian inkhawm an neih bakah, thisen pek rûnpui an huaihawt a, Saiha District Hospital tan thisen unit 40 an pe a, a petute mipa 24 leh hmeichhia 16 an ni.

Thisen pe
1st. battalion Mizoram Armd Police (MAP) te chuan nimin khan an din champha vawi 44-na pualin thisen unit 33 an pe a, a petute mipa vek an ni.

Mi pahnih thi
July 19, Nilaini tlai dar 4 vel khan Champhai aṭanga Aizawl pan 407 truck chu Khawzawl dáia quarry bulah chesualin, kawng thlangah a lum a; driver Lalmuanthanga (25), New Champhai chu Khawzawl damdawi-in panpui an tum laiin a thi a, driver dang Lalhlupuia (21), Champhai Tlangsam pawh Khawzawl damdawi-inah zan dar 8 velah a thi ve leh a ni.

Khawmpui hmang
Mizoram Diabetics Association (MDS) chuan nimin khan IPR directorate auditorium-ah khawmpui ang hmang a, NCD state nodal officer Dr Eric Zomawia'n zunthlum chungchang a sawifiah bakah, chawhnu lamah NPCDS thawkte'n free clinic an buatsaih-sak a ni.

In report tur
Serchhip DC Sangchhin Chinzah chuan thupek chhuahin, Home department aṭanga an lehkha dawn bawhzuiin, airgun-22/.17 (Spring. Nitro Piston/Co2/PCP/others) leh air pistol-22/177 ( Spring . Nitro Piston/coe/ others) neite tan August, 2017 chhungin DC office-ah in report tur a nih thu a tarlang.