Zâwl kan dawh rih avangin Ind. MLA-te an la MLA - Zoramthanga

MNF president Zoramthanga, chief minister chuan independent MLA-te chu disqualify theih reng an nih thu sawiin, "Zâwl kan dawh rih em em a, an la MLA mai mai," a ti.

Zoramthanga hian nimin khan Mizo Hnam Runa inkhawmah thu sawiin, independent MLA-te chungchang a sawi a, "ZPM zawm tak tak thei si lo, zawm ve deuh, zawm lo deuhin an awm a, an zawm chuan disqualify theih an ni. MLA nihin House-ah eng group-ah nge an tel dawn tih chian a ngai a, ZPM group dinin, an tel thu an thlen. Chu chu a nghet a ni," a ti a, MLA-te chuan vawi khat an luhna an tlansan chuan uire an nih thu a sawi.

ZPM group chu Speaker pawhin a pawm thlap thu sawiin Zoramthanga chuan, "Opposition group leader nihna pawh an ṭhutna tur nen a pe vek. ZPM party angin a ding ta si a, a lài zo ta vek. Vawi khat chu 'ZNP hi ZPM-ah a bo a bâng awm loin kan lut vek e' a ti a, kha kha chu disqualify-na tling zak a ni. An in-withdraw kual leh a, report a awm vek si," a ti.

MNF President chuan, MNF chuan ṭhiante namthlak an hreh a, independent MLA-te disqualify tir tumin hma an la lo nia sawiin, "Congress ni se House-ah an ṭhu tawh miah lo ang. Congress ruling party nih lai ni se, kei ni hetiangin awm ila kan MLA miah loh ang. Speaker-in min disqualify ang a, House-ah kan ṭhu lo ang," a ti a; an la ngawih rih thu a sawi.

Speaker-in duh se chuan tuna hmanrua (material) awm hmangin ZPM MLA-te chu a disqualify vek thei nia sawiin Zoramthanga chuan, "Lo awm rih mai mai rawh se kan ti a ni. ZPM party function-ah lawm luttuah an la ṭang em, an action-in a sawi chian chuan disqualify theih a ni tih Supreme Court order-ah a awm vek. Zâwl kan dawh rih em a, an la MLA mai mai a ni," a ti.

MNF President chuan, tui anga nghet lo party belh tlak an ni lo tih sawiin, "Bible-ah pawh kan hmu a, mi nghet lo Pathianin hman tlakah a ngai lo. A hniam lam lamah tui a luang kual mai mai ang hian an luang kual mai mai. A remchang ber leh an tana hlâwkna a awmna tur lamah an luang kual mai mai a ni," a ti a; MNF chu a tìr aṭangin nghet taka an din tlat thu a sawi.

India ram chu Parliament-ah group hnihah a inṭhen thu sawiin Zoramthanga chuan, "Pakhat chu Congress group a ni a, chu chu UPA, Congress duh lo ho chu NDA an ni. Congress kan nih loh avangin NDA-ah kan tel a, chutah chuan Pu Hmangaiha pawh PC ang, Pu Duha pawh ZNP angin an tel. Congress duh lo ho kan tel vek, chuvangin, han inkâwk chhawng tur kan awm lo. Ṭha kan ti tlang, vawiin thleng ṭha kan ti," a ti.

MNF President chuan, Congress party-in a tûka dawt a ni tih lang chhuak leh mai tur hmangin sorkar an bei duh nia sawiin "CAB chungchangah pawh Inner Line Regulation-in a huamte an tel lo ang, tih draft-ah a tel a ni. Heti chung hian an hotupa berin, 'An sawi mai mai a ni, ziakin engmah a awm lo' tiin a sawi duh," a ti a; CAB draft chu MP zawng zawngte Parliament-a pharh a nih hmain pek vek a nih thu a sawi.

Inkhawmah hian MNF President hian an party-ah ZPM secretary hlui James C Lalnuntluanga, ZPM secretary hlui K Vanlalvena, MPC general secretary hlui J Lianngura leh mi dangte a lawm lût a ni.