Mizo Carbon Product thubuaiah ACB-in mi 20 thubuai a siamsak

Anti Corruption Bureau (ACB) chuan Mizo Carbon Product Ltd. thubuai an chhui tawhnaah mi 20 thubuai an siamsak.

ACB chuan Mizo Carbon Product an chhuina report chu sorkarah an thehlut tawh a, sorkar remtihna angin criminal case ziah luh a ni.

ACB hian FIR an dawnin, chhui zui zel tlak a nih leh nih loh an chhui hmasa ṭhin a, an thil hmuh chhuah (report) chu sorkarah an thehlut a, sorkarin thubuai kalpui zel dan turah thutlukna a siam ṭhin.

Sorkar chuan ACB report aṭang hian thubuai hi criminal case emaw, departmental inquiry-a kalpui turin a ti ṭhin a, thubuai ṭhenkhat chhui zui tlaka a ngaih loh erawh a titawp ṭhin.

ACB-in Mizo Carbon Product chung-changa mi 20 thubuai a siamsakte hi sorkar sum cheng nuai 1376.47 tichingpena puh an ni a; thubuai siamsakte chu sorkar official paruk, Mizo Carbon Product mi leh sa pasarih leh sumdawng pasarih an ni.

Eptu party-te leh he thubuai chungchanga Gauhati High Court, Aizawl Bench-a PIL thehlutute chuan sorkar hotute hming chu he thilah hian sawi ri tel ring mah se, ACB-in thubuai an siamsak zingah hian sorkar hotute an tel lo.

ACB hotute chuan, Gauhati High Court-in a phût angin an report chu Court-ah an thehluh tawh thu Vanglaini an hrilh. Court chuan, thubuai hi Central Bureau of Investigation (CBI) chhuitir leh kher a ṭul leh ṭul loh chu ACB report aṭangin an zir chiang dawn a ni.

June 13, 2016-a Council of Minister thu-tlukna angin, chief secretary Lalmalsawma chuan Mizo Carbon Product-in Central Transport Subsidy leh Central Capital Investment Subsidy dik lo takin a dil nia sawi chhui chiang turin ACB a hriattir a ni.