Rinmawia leh Sangkunga chungchang Chief Minister-in a la ngaihtuah lo

Chief minister Lal Thanhawla chuan, NIAS, Kolkata-a Mizo zirlai tirh chungchang chhuitu, Enquiry Commission-in an thiam lohna a hmuh loh minister hlui Lalrinmawia Ralte leh Mizoram Youth Commission (MYC) chairman hlui T Sangkunga te chungchang a la ngaihtuah lo a; an nihna ngaiah dah an nih dawn leh dawn loh a la sawi thei lo.

Nalanda Institutes of Advance Studies (NIAS), Kolkata-a zirlai tirh leh thil dang vangin Labour, Employment and Industrial Training (LEIT) minister hlui Lalrinmawia Ralte leh MYC chairman hlui T Sangkunga chu eptu party-te'n báng turin an phût a; Lalrinmawia Ralte leh T Sangkunga te hian February 15, 2017 khan an nihna aṭanga bànna Chief Minister hnenah an thehlut a ni.

NIAS, Kolkata-a zirlai tirh an nih dan chhuitu Enquiry Commission chuan, Lalrinmawia Ralte leh T Sangkunga chu NIAS-a zir tur thlannaa inrawlh lo leh inhnamhnawihna an nei loah a ngai a ni.

Vanglaini palai zawhna chhangin Chief Minister chuan, Lalrinmawia Ralte leh T Sangkunga chu puh an nihnaah Enquiry Commission-in an thiam lohna hmu lo mah se, minister leh MYC Chairman-ah dah an nih leh dawn leh dawn loh a la hriat loh thu a sawi a, "Ngaihtuah tumna kan nei hrilh lo, kan la ngaihtuah hman lo," a ti.