Tlabungah total bandh huaihawt a ni

National Eligibility & Entrance Test (NEET) kaltlanga Mizoram quota-a medical course zir tur thlannaah Chakma-te Category-1 a dah an nih duh loh lantir nan leh, chumi dodalna lantirnaa hliam zirlaite thlavâng hauh nan nimin khan Tlabungah total bandh huaihawt a ni.

Mizoram quota-a MBBS leh BDS zir tur thlan dana lungawi lo MZP leh Mizoram sorkar inrem tawh mah se, MZP sub-headquarters, Tlabung chuan ruahmanna an lo siam tawh chu kaltlangpuiin, Tlabungah total bandh an huaihawt a; boruak duhawm lo thleng hriat a ni lo.

Tlabung Post editor Vanlalhriatpuia hnen aṭanga thu dawn danin, Tlabunga bandh huaihawt tur hian Tlabung MZP-te chu nimin zing dar 5 aṭang khan khaw chhung hmun hrang hrangah an duty a; dan buai ngai mihring leh lirthei veivâk an awm mang lo.

Total bandh vang hian zirna in hrang hranga exam lai a khaihlak a, zirna-in, sorkar pisa leh dawrte khar a ni a, khualzin phur lithei an ding vek bawk. Bandh chu mipuiin an thláwp ṭhaa an hriat avangin MZP chuan chhun dar 12-ah an titawp a ni.

Tlabung MZP president Vanlallawma chuan, Chakma-te'n an phu tâwk aia dinhmun ṭha zâwk an chuh avangin Mizote inkarah buaina a chhuak fo niin a sawi a; hmun danga Chakma-te aiin Mizorama Chakma-te dinhmun a ṭha zâwk nia sawiin, "Kan rama Chakma-te hi an chan tâwka lungawi turin kan hriattir a ni," a ti.

Tlabung MZP chuan Chakma zirlaite counselling tura koh an nih chungchangah minister of state Dr Budha Dhan Chakma chu thûk taka inrawlhah an puh.

Hetihlai hian district khawpui hrang hrangah chuan Chakma zirlai paliten Mizoram quota-a MBBS leh BDS zir tir tum duh loh lantirna atana total bandh buatsaih tum chu, MZP hruaitute leh sorkar hotute'n inremna an siam tak avangin ṭhulh a ni.