Sorkar hnathawk ṭha lote'n min timualpho thei - CM

Chief minister Lal Thanhawla chuan, sorkar hnathawk ṭha vak lo tam tak Mizoramah an awm niin a sawi a, "Chu'ng mite chuan min timualpho thei a ni," a ti.

Nimin khan Congress Bhavan-ah thu sawiin Lal Thanhawla chuan, "Sorkar hnathawk ṭha tak tak eng emaw zat an awm laiin, sorkar hnathawk ṭha vak lo eng emaw zat an awm a, chu'ng mite chuan min timualpho thei a ni tih hriat a ngai," a ti a; MLA-te chu sorkar hnathawk ṭha lote'n an hnungkhirh em, tih ngaihtuah turin a chah.

Congress party president ni bawk Lal Thanhawla chuan, CAG report behchhana sorkarna siam tum an awm tih sawiin, "CAG report hmanga sorkarna siam ka la hre lo. Thil dik lo chu kan do ngam tur a ni a, CAG report-ah hian dâwt a tam," a ti.

Chief Minister chuan, MNF sorkar lai pawhin CAG report-ah thil tam tak dik lo awm a ṭhin nia sawiin, "Rural Development department-ah pawh tuna MNF Vice President-in a chan laiin cheng vbc. 9.71 hmanna chu a rinhlelhawm tiin report-ah ziah a ni. He report hi MNF Vice President hian dikah a pawm em?" a ti a;

BAFFACOS sum hmanna pawh dik lo tam tak awm angin CAG report-ah ziah a nih thu a sawi.

Kawng chungchang sawiin CM Hawla chuan, "Hmarchhaka state dang kawngte en se, kan ram aia chhe zawk a awm lo a nih chuan duh tâwkin sorkar sawi chhe rawh se," a ti a; state dang kawng dinhmun hre si loa sorkar sawisel ngawt chu thil dik a nih loh thu a sawi.

Lal Thanhawla chuan, Central lamah Congress party-in sorkarna chelh rih lo mah se, BJP leh a thurualpuite tum a ṭhat loh em avangin an sorkar reng lo thei tih a sawi a, "Central-a sorkar leh tur hian kan inpuahchah reng a ngai a, he laiah kan lo inthlahdah tur a ni lo. Sorkar kal dik lohna te, party ang pawha kal dik lohnate kan nei thei a, kan inbihchian reng a ṭul a ni,” a ti bawk.