Sorkar hi 'Phunṭiha sorkar' kan ang - Zoramthanga

MNF president Zoramthanga chuan nimin khan Mizo Hnam Rûna inkhawmah thu sawiin, ram neitute chanvo chu theihtawpa humhalh a ṭul thu a sawi a; Congress party kaihhruai Mizoram sorkar chungchangah, "Kan sorkar hi 'Phunṭiha sorkar' kan ang khawp mai," a ti.

Zoramthanga chuan, Mizoram quota-a doctor zir tur thlan dan vanga July 20-a buaina a chhuak leh Mizo leh Mizo inkara buaina a thleng chu pawi an tih thu sawiin, "Sorkar fimkhur loh rah leh hnama an chian loh vang a ni. Thil ṭha taka sawiho theih sawiho duh loh vanga buaina chhuak a ni," a ti a; MNF sorkar lai chu ni se, thil duhawm lo a thlen loh tur thu a sawi.

Miin sawi tur an neihte chu ngun taka ngaihthlak chuan sawi âwm tak leh ngaihtuah tham tak a lo awm ziah nia sawiin Zorama chuan, "He thil thleng hi kan sorkarin 'Kan tláwm dawn lo,' an tih rah a ni," a ti a; incho thinrim zawnga thil tih chu ṭha lo an tih thu sawiin, "MNF chuan thil thlengah hian sorkar kan dem hle a, hliamte pawh sorkarin ṭha taka enkawl zel turin kan phut a ni," a ti.

MNF President chuan, ram neitute ngaih pawimawh tur an nih thu sawiin, ram chhunga chengte chu chi thum - indigeneous people (ramneitu, a tir aṭanga luahtu), pém lutte leh mikhualte an nih thu leh, chanvo bik ṭheuh an neih thu a sawi.

Ram neitute humhalh bik a ṭul tih sawiin Zorama chuan, "Kan sorkar hi mikhual party an ni a, nimina buaina pawh kan sorkar lai chu ni se, kan inremna thutlung nen Court sang zawka kalin kan chingfel mai dawn a ni," a ti.

NIAS, Kolkata chungchangah Zoramthanga chuan, sum leh pai hman danah thil felhlel a tam tih sawiin, "An kalpui dan a dik loin a fel lo tak zet," a ti a; Chief Minister pawhin an dik lohna pawmin tun thlengin LEIT Minister leh MYC Chairman-te chu an nihna aṭangin a bàn phah tih a sawi.

MNF President chuan, NIAS-a zirlai tirh chungchang chhuitu Enquiry Commission chu a chhui tur dik tak chhui loah puhin, "Welfare Board pawisa hmanna chhui chian awm tak a ni a, a chhui tur dik chhui loin, an chhui tur point chu a buk ṭhelhin an ṭhelh a ni," a ti a; Commission-in LEIT Minister leh MYC Chairman an inhnamhnawih lo anga a report chu Mizo mipui zahlohna a nih thu leh, MNF-in a tawp thlenga hma an lak tur thu a sawi bawk.