Lungleiah mi 1,24,290-te thla laksak tawh

India khua leh tui kum khat chin chung lamte Aadhaar card neihtir vekna tura hmalakna kal mekah, Lungle district-a RD block hrang hrangte chuan hna an thawk mek a; Lunglei district-ah hian nimin thleng khan mi 1,24,290-in Aadhaar card atan thla an la tawh.

Lunglei district-ah hian DC office bakah, RD block tina khua leh veng hrang hrangah thawktute insem darhin thlalak hna an thawk mek. Tunah hian Lungsen RD block chhungah operator pali, Hnathial block-ah mi pathum, Lunglei block-ah mi pahnih, Bunghmun block-ah mi pariat leh Tlabung Sub-Division-ah mi paliin hna an thawk a; khaw hrang hrangah insemin, Aadhaar card siam hna an thawk mek.

Hetih lai hian, inkalpawhna leh internet ṭha tawk lo vangin thawktute'n harsatna an tawk a, an duh angin hna an thawh chak theih loh phah nia thu dawn a ni.

Record-a a lan danin, UIDAI hnuaia Aadhaar card siam hna thawh mekah Lunglei district-ah chuan mi 1,79,742-te Aadhaar card siamsak tum a ni a, tun dinhmunah mi 1,24,290-te thla an laksak tawh a ni.