MNF leh Congress-in Chakma thu-ah Sawi tur an nei lo - ZNP Vice President

ZNP vice president Kenneth Chawngliana chuan, MNF leh Congress party-te'n Chakma chung-changah sawi tur an nei lo niin a sawi a, "Tun ṭuma MBBS chung-changa Congress leh MNF party an ngawi hmak hi a mak hle a ni," a ti.

Nimina ZNP pisaa inkhawmah Kenneth Chawngliana chuan, "Chakmate hi hmanlai aṭangin Bangladesh ram hi an ram a ni a, lalram neiin an awm ṭhin. Mizoram buai chhah lai taka UT kan nih dawn laiin vai ho fin kherek vanga Mizorama autonomous district council nei ta an ni a, Mizoram mi an ni lo," a ti a; Chakmate chu fimkhur taka enkawl an ngaih thu a sawi.

Kenneth Chawngliana chuan, MNF-in an party tihlen duh avang-in Chakma MLA an nei tawh a, CADC-ah MNF sorkar a ding tawh bawk tih sawiin, "Congress leh MNF party hian Chakma chung-changah engmah sawi tur an nei lo. Tun ṭuma MBBS issue-ah pawh hian engmah sawi ve ngam loin an ngawi hmak mai a ni," a ti.

ZNP Vice President sawi danin, India sorkar leh MNF inbiak laiin PC party-in sorkar laipui hotute hnenah inbiakremnaa Chakma District Council ṭhiat tel turin rawtna an thlen a; chu chu ngaithei loin MNF president emmisary Aichhinga’n PC President hnenah lehkha a thawn a, Chakma chung-chang sawi ve lo turin thu a pe a ni.

Kenneth Chawngliana chuan, Arunachal Pradesh-ah chuan hun rei tak an awm tawh chungin Chakmate chu vote an neih ve an la phal lo niin a sawi a, "Keini ramah chuan party ṭhenkhatte’n lal an duh lutuk vangin vote kan neihtir a, MLA pa-hnih lai an nei ta. Congress sorkar-ah phei chuan minister hial an nei fo mai a, an hnawksak hle a ni," a ti.