LMC inthlan buaipuina tur sum SEC-in Mizoram sorkarah a dil ; Inthlan hun tur hriat theih a la ni lo

Mizoram State Election Commission (SEC) chuan Lunglei Municipal Council (LMC) inthlan buatsaihna tura sum mamawh Mizoram sorkarah a dil mek. LMC inthlan hun tur erawh hriat theih a la ni lo.

Vanglaini palai zawhna chhangin state election commissioner (SEC) Laima Chozah chuan, LMC inthlan buatsaihna atana sum mamawh turah ruahmanna siam turin Lunglei DC an hriattir thu a sawi a, "Lunglei DC-in estimate a rawn siam hi a tam deuha kan hriat avangin siamṭha leh turin kan ti a, DC hian a rawn siamṭha leh tawh a, chu chu GAD-ah kan thehlut tawh," a ti.

Laima Chozah chuan, Mizoram sorkarin sum a pek chhuah hunah electoral roll ennawn a nih tur thu sawiin, "LMC atan hian roll revision neih a ngai a, Election Commission of India electoral roll aṭangin revision neih a ni ang," a ti a; electoral roll ennawn zawh hunah inthlan buatsaihna tur ṭul dangte an buaipui chhunzawm tur thu a sawi.

LMC inthlan buatsaih theih hun tur sawi theih a la nih loh thu sawiin SEC chuan, "LMC atan hian notification chhuah a ni tawh a, notification chhuah aṭanga kum khat hmain inthlan buatsaih a ngai," a ti.

November 16, 2021-a chief minister Zoramthanga hoa council of minister ṭhukhawm chuan LMC din an remti a, ward tihfel tawh niin, ward 11 a awm dawn. Hmeichhe ward pali a awm dawn a, hmeichhe ward tur chu la pawh chawp a ni ang. Kum 2022-23 budget-ah LMC atan cheng nuai 80 dah a ni.

Mizoram sorkar chuan tun hnai khan LCM chief executive officer atan Benjamin Lalzama, MCS leh secretary atan R Vanrengpuia, MCS a ruat tawh bawk.

Hetihlai hian, LMC pisa tur peih fel a la nih loh avangin CEO, Secretary leh thawktu dangten an hna an la zawm lo. LMC pisa tura ruahman chhin chu rokhawlhna avangin a rem leh loa, hmun dang ruahman leh niin, pawm fel a la nih loh avangin pisa atan buatsaih ṭan a la ni lo.

UDPA changtu deputy chief minister Tawnluia chuan, kumin chhung ngeiin LMC inthlan buatsaihtir an tum thu leh inthlan buatsaih a nih theih nan theihtawp an chhuah thu a lo sawi tawh a, "Ka department chan hnuaia mi a nih angin hmanhmawh luat vanga dài buak erawh ka tum lo," a ti.

Deputy Chief Minister chuan, LMC chu a rang thei ang bera kaltir duh mah se, dan hnuaiah thil tih ngai a tam avangin hmanhmawh theih a nih loh thu a sawi a, "Tunah hian Lunglei khawpuiah LMC pisa din turin hma kan la mek a ni," tiin, inthlan buatsaih a nih hmain LMC pisa neih a ṭul thu a sawi.