Lungsenah sikul kái tur dan a ni

Lungsen khuaa páwl hrang hrangte telna, Joint NGO Coordination Committee (Joint NGO) hmalaknain zirtirtu sawn chhuah duh lohna leh zirtirtu dah tura sorkar kar nan nimin aṭang khan Lungsen khuaa sikul zawng zawnga sikul kai turte dan a ni.

Lungsen High School-a Mathematics leh Science zirtirtu sawn chhuah duh lohna leh zirtirtu dang dah tura sorkar phûtin MZP Sub-Headquarters, Lungsen hmalaknain sikul kai tur dan a lo ni tawh a, zirtirtu sawnna thupek hâl a lo ni tawh bawk.

Lungsen MZP hma­laknain awmzia a neih loh avangin zau zawk leh na zawka hmalak a nih theih nan August 22, Thawhṭanni zan khan Lungsen North Branch YMA Hall-ah pawl hrang hrang aiawhte an kalkhawm a, Joint NGO Coordination Committee an din a ni.

Joint NGO chuan MZP hmalak tawhna chu ṭha an ti a, na zawka hmalak an rél nghal a; an rorel angin nimin aṭang khan Lungsen khuaa sikul zawng zawnga sikul kai turte an dang ṭan a ni. Joint NGO hmalaknain awmzia a neih lo a, August 26, 2022 (Zirtawpni) ral hmaa Lungsen H/S-a regular post ruak hnawhkhah chungchangah thu lawm­awm a awm loh chuan kar leh aṭangin na lehzuala hmalak an rél bawk.

Lungsen Joint NGO chuan, "Sorkarin kan harsatna leh kan duh a hria a, regular teacher a sawn chhuak thei a nih chuan regular teacher dang a dah leh thei tih kan chiang. He kan duhna hi a rang lama min chinfelsak kan duh a ni," an ti.

Lungsen Post Editor hnen aṭanga thu dawn danin, sikul kái tur dan chungchangah Lunglei Bawrhsap chuan vawiin chhun dar 12 hian DC Con­fe­rence Hall-ah ṭhut­khawm a ko a; Lungsen Joint NGO aiawhte pawh tel tura sawm an ni. Ṭhutkhawmah hian an tel dawn leh dawn loh Joint NGO chuan nizan khan an ngaihtuah a, an thu­tlukna hriat hman a ni lo.