Police-in MRHGCD hnenah silai 300 an pe

Mizoram Police chuan nimin khan Police Headquarters-a GS Arya Mess-ah Mizoram Home Guards & Civil Defence (MRHGCD) hnenah silai 300 leh a mu ṭhahnem tak an pe a, Home minister Lalchamliana'n a hmanpui.

Mizoram Police hian silai chi hnih - SLR (self loading rifle) 200 leh INSAS (Indian small arms system) 100, a vaiin 300 an pe a; silai pakhat atan silai mu 20 ṭheuh awmna magazine pali zel an pe tel bawk.

Home minister Lalchamliana chuan, phâk tâwka ralthuam leh hmanraw ṭha neih a pawimawh thu sawiin, "Mizoram Police hian silai leh ralthuam a ṭha thei ang ber nei se tih hi ka duhthusam a ni a, a theih chin chinah hma kan la zel a ni," a ti.

Lalchamliana chuan, "MRHGCD-ah a ngheta thawk 200 an awm tling lo a, volunteer-te nen 1,000 vel an awm. India ram state tinah an dinhmun hian duhthu a la sâm lo hle," a ti a; MRHGCD volunteers tur mi 11 vel lâk belh an dil mek thu a sawi.

Mizoram Police-in MRHGCD hnena silai la ṭha tak tak an pe chu thil chhinchhiah tlak a nih thu sawiin Chama chuan, "Hun eng emaw ti aṭang tawh khan MRHGCD hnena silai hlan hi ṭul tihna a awm tawh a, sorkar kalphung dan leh hrai zawm a ngaih ṭhin avangin kan beisei aiin hun a duh rei a ni," a ti. Civil Defence lam tihchak tumin MRHG directorate-in hma a lâk mek thu leh Mizoram hmun hrang hrangah phuisui zawka din theih thuai beisei a nih thu a sawi bawk.

MRHGCD commandant general Maj. Zosangliana Hualngo chuan, silai an mamawhna leh a ṭulzia Home Minister leh Mizoram Police-te'n an hriatthiampui chu lawmawm a tih thu leh, an silai neih thar chuan inrintâwkna a pek bakah, ṭha leh awmze nei zawka an duty theih phah a beisei thu a sawi.

Silai leh a mu inhlanna inkhawm hi IGP (Hqrs) John Neih­laia'n a kaihruai a; Home Minister hriatpuinain inhlanna lehkha ziah a ni a, Mizoram Police aiawhin John Neihlaia leh MRHGCD aiawhin Maj. Zosangliana Hualngo ten hming an ziak a ni.