CYMA-MYC mistiri training hawn a ni

Mizoram Youth Commission (MYC) leh Central YMA chuan Mizo ṭhalaite tan cement mistiri training an buatsaih ṭan a, nimin khan CYMA Hall-ah CYMA president R Lalngheta'n a hawng.

CYMA-in cement mistiri training a buatsaih hi ṭum 19-na a ni a; tun ṭumah hian YMA branch hrang hranga zir duh hming pete zingah mi 52 thlan a ni. Vawiin hian CYMA pisa huam chhungah training ṭan nghal a ni dawn a, September 30, 2022-ah khâr a ni ang.

Cement mistiri training chhung hian stipend, dearness allowance leh chhûna ei leh in man pek vek a ni dawn a, training zote hnenah cement mistiri bungrua Rs 2,000 man pek vek an ni dawn bawk.

CYMA president R Lalngheta chuan, training turte fuihin, "Hnam dang vai cement mistiri-te kan ram aṭanga kan ûm chhuah theihna tur chu an thawh ai kan thawh theih a, tih tak takna nen a taka hna kan thawh ve hi a ni," a ti a; chhawrtute thu ngaihchàn thiam a pawimawh thu sawiin, training turte chu an inzir chhuah hunah pawh inti-mistiri nghal lutuk lo tur leh chhel taka bul ṭan turin a chah.

Report petu CYMA general secretary Lalnuntluanga chuan, Mizo ṭhalaite tan CYMA-in sorkar nen ṭanghoin cement mistiri training ṭum 18 a lo buatsaih tawh thu leh mi 1,350 chuang an inzir chhuah tawh thu a sawi a; inzir chhuakte zingah eizawnna tak tak atana hmang mi eng emaw zat an awm tawh thu a sawi bawk.