Kohhran mit tlung takin inthlan kan hmachhawn dawn - Thanzara

Mizoram Pradesh Congress Committee (MPCC) vice president Lal Thanzara chuan, Congress party-ah haw rûnpui a thlen mek thu leh kum 2023-a inthlanpui awm tur chu kohhran mit tlung taka an hmachhawn dawn thu a sawi.

MPCC Campaign Committee ruahman anga East Tuipui North Block chhunga khaw hrang hrang a fannaah Lal Thanzara chuan, Congress party chu Pathianin hun lo la awm zel tur atan a buatsaih nia sawiin, "Congress party kalphung a danglam dawn. Congress party inbuatsaih thar zelah hian inthlan kan hmachhawn dan pawh nasa takin a danglam tawh dawn a, kohhran mit tlung takin inthlan kan hmachhawn dawn a ni," a ti.

MNF hruai sorkarin Mizoram mipui sum nasa takin an suasam mek nia sawiin Thanzara chuan, "MNF sorkarah mi retheite'n chanvo an nei lo a, mi pangngai rin an hlawh tawh lo. An mangang a, sum enkawl thiam loh vanga leiba tam tak rulhna atan mi dang pawisa pûk chhawn leh ngaiin min siam mek a ni," a ti a; MPCC president Lalsawta'n 'Ṭhat loh theih lohna báwm' a ruahman hmangin a hruai dawn tih a sawi. 

Lal Thanzara chuan, Congress party-ah haw rûnpui an nei mek tih sawiin, haw zel turin mipui a sáwm a, "Kan mithiamte nen ram leh mipui tana ṭha ber turin policy uluk takin an duang mek. NLUP hmangin mipui rawng theihtawpin kan báwl tawh a, chumi hun chu a liam tawh. Tunah chuan mi taimate ṭanpuina tur, 'Ṭang puihna' kan kal pui dawn," a ti.

Congress party-in sorkar hrim hrim an tum a ni lo tih sawiin Lal Thanzara chuan, "Mizoram mipui tana sorkar ṭha, ṭhat loh theih lohna báwm din a, mipui rilru siamṭhat hi kan tum a ni. Pathianin candidate mi ṭha tak tak min pe dawn," a ti a; thlaphang lo turin mipui a chah.

MPCC Vice President chuan, Congress sorkar laiin MNF-in an tihpàmṭùl tawh State Referral Hospital changtlung taka an din thu leh Mizorama medical college hmasa ber an din thu te, rél kawng an siam thu te, airport an siam thu te, MNF-in sum siamna atana an hman vanga an pàmtùl tawh Tuirial Hydel Project an tihpuitlin thute a sawi bawk.

Lal Thanzara hian East Tuipui biala Farkawn, Vaphai, Saikhumphai, Chawngtui, Dungtlang, Khuangthing, Zawlsei, Thekpui, Thekte leh Khankhawn khuate a tlawh a ni.