HIV/AIDS do chungchang sawiho

Nimin khan Assembly Annex Conference Hall-ah sorkar, kohhran leh páwl aiawhte'n HIV/AIDS kài awlsam zawk tura ngaihte leh dinhmun hlauhawma ding mekte tana ṭanpuina (harm reduction programme) chak zawk leh nasa zawka kalpui dan tur an sawiho a, Health minister Dr R Lalthangliana'n a hmanpui.

Health Minister chuan, HIV/AIDS chu ṭanrualna nen hneh theih a nih thu sawiin, "Covid-19 donaa Zoram mipui zawng zawng kan ṭangrual ang khan min rûn mektu HIV/AIDS hi inlungrual tak leh beidawng duh miah loa kan do tlân chuan chhiatna lian zawk kan pumpelh thei," a ti.

HIV/AIDS-ah Mizoram dinhmun a ṭha lo hle tih sawiin R Lalthangliana chuan, "India ramah kan dinhmun a ṭha lo fál hle a, Health department leh MSACS ringawt tan tihziaawm a theih loh tih a chiang," a ti a; HIV/AIDS a tlakhniam theih loh chhanah mi tinte'n mawh an phur tih an pawm a ngaih thu a sawi.

Health & Family Welfare Board vice chairman Dr ZR Thiamsanga, MLA pawhin thu sawiin, "HIV kai hmuh chhuah zinga 65% vel chu mipat hmeichhiatna aṭanga kai an ni a, 32% vel chu ruihhlo tih aṭanga kai an ni," a ti.

Sawihonaah hian kohhran, tlawmngai pawl leh HIV/AIDS kaihhnawih department aiawhte an tel a; HIV/AIDS donaa hmalak zel dan turah thawho an remti a ni.

SAWIHONAA TARLAN ṬHENKHAT
= India rama HIV/AIDS vei tam lam survey-na kum 15-49 inkar aṭangin statistics lak a ni.
= Zirchiannaa a lan danin, Mizorama HIV/AIDS vei tam lam percentage chu India ram pum percentage aiin a lêt 10-in a sang zawk.
= Kum tina Mizorama HIV/AIDS vei punnain hniam lam a pan thei lo.
= HIV veite enkawl theih ni mah se, kài tawh chuan tihdamna a awm loh avangin a darh zel loh nan hmalak a pawimawh.
= Sorkar department leh kohhran te, YMA, MHIP, MUP, zirlai pawlte ṭanruala inpuih tawn a ngai.