Samagra Shiksha sikul 17 hawn tum

Chief secretary Dr Renu Sharma kaihhruaiin nimin khan CS conference hall-ah Samagra Shiksha Executive Committee an ṭhukhawm. Academic session 2022-23 ah Samagra Shiksha hnuaiah sikul thar 17 hawn tura ruahman a nih thu tarlan a ni.

Samagra Shiksha state project director Lalhmachhuana chuan, kum 2018-2023 chhungin sikul 52 hawn thar tura ruahman a nih thu sawiin, "Tun academic session 2022-23 ah hian sikul 17 hawn thar tura ruahman a ni. NEP 2020 tihhlawhtlin nan sikul dinhmun tehna tur standard setting and accreditation chu MBSE bawhzui turin thuneihna pek a ni tawh," a ti.

Ṭhutkhawmah hian School Education department-a Media Cell-te'n hripui lèn laia cable TV-a tutorial video clip an tihchhuah ṭhin chu Zirna Huang leh Zirlaite Puitu youtube channel-ah dah a nih thu te, Educational TV Programme chu chawlhkar tin Ningani tlai dar 6-ah Doordarshan Kendra, Aizawlah tihchhuah ṭhin a nih thu te, sikul 52-ah vocational education kalpui mek a nih thu te, zirtirtute intuai hriam nan NISTHA training-ah HSS zirtirtute an inziah luh ṭhat a pawimawh thute an sawi.

Meeting-ah hian School Education secretary Dr Lalzirmawia Chhangte leh hotu dang te, Samagra Shiksha hotute leh zirtirtu pawl aiawhte an tel a ni.