Sakawrdaia post ruak hnawhkhah phût

Sakawrdai Village Council leh pawl hrang hrang Joint YMA, Joint MHIP leh Hmar Students Association-te chuan, Sakawrdaia sorkar pisa hrang hranga post ruakte hnawhkhah an phût a, a remchan dan anga na zawka hmalak zel an tum.

Saikawrdai VC leh pawl hrang hrang hruaitute chu August 22, Thawhṭanni zan khan inhmukhawmin, Sakawrdaia sorkar pisa hrang hranga thawktu indaih lohna chungchang an sawiho a, "Office-te hi a nihna tur ang diak diakin an function thei lo tih kan hria a, amaherawhchu, thawktu awm sa, thihna, pension leh transfer vanga hnawhkhattu awm loa a ruak zel hi kan ngaithiam lo a, hriatthiam harsa kan ti hle a ni," an ti.

Sakawrdaia sorkar hnathawk post ruak mekte chu a rang thei ang bera hnawhkhat ngei turin sorkar an phût a; an ngenna leh phûtnain awmzia a nei lo a nih chuan na zawka hmalak an tum a ni.

SAKAWRDAI LUNGAWI LOHNA LEH THIL PHÛT
1. Dental surgeon awm tawh ṭhin, sawn chhuah a nih hnuah tun thlenga a aiawh dah la ni lo.
2. X-ray technician Hmingduhawma transfer a nih hnuah a aiawh Mary Vansangpuii’n tun thlengin a la zawm lo.
3. Opthalmic assistant transfer a nih hnua a aiawh dah ni tawh lo.
4. Laboratory technician transfer aiawh dah a ni tawh lo.
5. Health worker tuna awm mek transfer order a chhuak tawh a, a aiawh tur siam la ni lo.
6. Sakawrdai CHC bial chhunga IV grade - Vaitin, Thingât, Zohmun leh Sakawrdaia mite an aiawh dah la ni lo.
7. Health supervisor, September thlaa pension mai tur chu a aiawh tur siam nghal ni rawh se.
8. Sakawrdai SDO(C) office peon leh LDC aikalte tih loh, amah SDO(C) leh thawktu dang awm tur ang angte nen awm ve rawh se.
9. Sakawrdaiah PHE JE post dah leh ni rawh se.
10. Sakawrdaia Power & Electricity post pahnih ruak hi a rang thei ang bera hnawhkhah ni rawh se.