Hortoki khawtlangin Civil Hospital, Aizawla nurse duty-te an dem

Hortoki VC leh pawl hrang hrangte chuan thuchhuah siamin, an khaw nu Zoramthari (35) w/o Isak Malsawmsanga, nau chunga a thihna chu Civil Hospital, Aizawla nurse duty-te inthlahdah vanga an ngaih thu leh nurse duty-te an dem tak zet thu an tarlang.

Hortoki VC & All NGO tarlan danin, Zoramthari hi nu hrisel tak a ni a, a naupai pawh nau a pai tawhah a la fit ber ṭumah a ngai a ni. Nau a hrin hun a hnaia inhriain August 4, 2022-ah Civil Hospital an pan a, ultrasound-a an enna aṭangin nau a la hlat thu an lo hrilh a, August 12-ah an veitir tur thu an lo hrilh a ni.

August 12-a an kal leh chuan nau a la hlat thu leh chhûl kawngka a la inhawn loh thu lo hrilhin, August 29-a kal leh turin an hawtir a; Hortoki-ah haw tawh loin, Aizawlah an nghak ta ani. August 17 zing dar 9 vel aṭangin a pum a na ṭan a, a nat zin tial tial avangin chhûn dar 12-ah Civil Hospital an pan leh a, tlai dar 4-ah nurse-te'n a dinhmun an enfiah a, a chhul kawngka a la inhawn zau loh thu an hrilh leh a ni. Zoramthari chuan a pum a nat em avangin zai mai turin a ngen a ni.

August 18 zing dar 2 vel aṭangin a pum ná a chàwl tawh lo a, nurse an koh pawhin eng a ang thei tawh lo a, August 18 zing dar 6:30-ah a thi ta a ni.

Hortoki VC & All NGO chuan, nurse-te'n doctor ráwn loa thutlukna an siam chu an dem thu an tarlang a, "He thihna hi hriatthiam harsa kan ti a, mi hausa zawk leh thil ti thei zawkte dam khawchhuahna turah thingtlang miretheite'n nunna hlu tak kan chán hi pawi kan ti hle. Hetih laia Civil Hospital, Aizawla nurse duty-te hi kan dem tak zet a ni. Inngaihsak lohna vanga thihna hi thleng ngei niin kan hria," an ti a; tun hnuah thleng tawh lo se an duh thu an tarlang.

Press release-ah hian Hortoki VC, Joint YMA, Joint MHIP leh YMA leh MHIP branch pahnih ve ve aiawhte'n hming an ziak a ni.