Mizoram COVID-19 : Dinhmun : Hripui vei enkawl lai mi 599 an awm

August 22, Thawhṭanni khan Mizoramah Covid-19 vei mi 214 hmuh chhuah a ni. Nimin khan hripui vei dam tawh mi 205 chhuahtir an ni a, Covid-19 vanga thi an awm lo. Nimin tlai khan hripui vei enkawl lai mi 599 an awm.

Thawhṭannia Covid-19 positive hmuh chhuah mi 214-te chu mipa 115 leh hmeichhia 99 an ni a, TrueNAT hmanga hmuh chhuah mi pahnih leh RAT hmanga hmuh mi 212 a ni.

August 22 khan district tinah hripui vei hmuh chhuah a ni a; swab sample endik zat 856 aṭanga positivity rate chu 25.00% a tling. August thla chhungin mi 3,519 hmuh chhuah a ni tawh.

IDSP record angin, Mizoramah Covid-19 vei 2,36,319 hmuh chhuah a ni tawh a, mipa 1,10,037 leh hmeichhia 1,26,282 an ni a, mipa aiin hmeichhia 16,245-in an tam zawk. Nimin tlai dar 5 thleng khan mi 2,35,003 (99.44%) chhuahtir an ni tawh a, mi 717 (0.30%) thi tawhin, enkawl mek mi 599 (0.26%) an awm.

Kum 2011 chhiarpui angin, Covid-19 vei hmuh tawh 2,36,319 chu state mipui zat aṭangin 21.54% a tling a, India rama state zingah a sang ber. Mi 1,000 zelah positive 215 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.