KHAWTHLIR
Thisen pe
KṬP, Chawlhhmun Bial chuan nimin khan Tuivamit Kohhran Hall-ah thisen pek huaihawtin, Civil Hospital, Aizawl tan thisen unit 36 an pe a, petute mipa 31 leh hmeichhia panga an ni. KṬP, Zotlang Branch, Aizawl pawhin an din champha pualin August 22, Thawhṭanni khan Civil Hospital, Aizawl tan thisen unit 38 an pe a, petute mipa 29 leh hmeichhia pakua an ni.
Zirlai tharte lâwm
Mizoram Christian College (MCC) chuan nimin khan Synod HSS Multipurpose Hall-ah an zirlai tharte lawmna inkhawm an buatsaih a, Mizoram University registrar Prof. Lalnundanga'n a hmanpui. MCC-ah hian zirlai 337 an awm mek a ni.
Electoral roll sawiho
Joint chief electoral officer David L Pachuau kaihhruaiin nimin khan a pisaah political party hrang hrang aiawhte'n electoral roll thar siamna tura ennawnna, Special Summary Revision 2023 chungchang an sawiho. Joint CEO chuan, electoral roll-a inziak lut turte tan Election Commission of India-in Aadhaar number thehluh tura a tih chu mimal duh thlannaah a innghat a tih avangin tihluihna a awm loh thu a sawi.
Heroin man
Mizoram Police-a CID, Special Branch-te chuan August 22 zan khan Kawnpui Kanan Vengah lirthei aṭangin heroin hawng 200 (kg. 2.7) leh a neitua puh Khualsawmsanga (37), Ngàizáwl leh Lalthangliana (44), Bukphir, Myanmar, Champhai Vengthara khawsa mek nia insawite an man.
Awareness Rally
Art & Culture department, Mizoram State Library leh Raja Rammohun Roy Library Foundation (RRRLF)-te chuan nimin zing khan Awareness Rally on Women Empowerment an buatsaih a, Human Resource Development Board vice chairman L Thangmawia, MLA-in Khatla kawn aṭangin a vailiam. Rally-ah hian Graceland School leh LR HSS zirlai 100 an tel a, Khatla kàwn aṭangin Mizoram State Library thleng kawng an zawh a ni.