Category-I hi Mizoram sorkar thu a ni - MZP ; Zirlai 22 hliamte enkawlna pek an phût

MZP chuan, The Mizoram (Selection of Candidates for Higher Technical Courses) Rules category-I a ram leilung fate leh ram leilung fa ni lote dah theitu chu Mizoram sorkar an nih thu an sawi a; hemi chungchang hi ngun taka ngaihtuah turin sorkar an phût. July 20, 2015-a police leh zirlaite innawrnaah hliam zirlai 22-te inenkawlna senso July thla chhunga pe turin sorkar an phût bawk.

MZP hruaitute chuan Inrinni khan Aizawl Press Club-ah thuthar thehdarhtute an kâwm a; an president Lalsangzuala Ngente chuan, Mizoram quota-a technical course zir tur thlanna atana dan hman, The Mizoram (Selection of Candidates for Higher Technical Courses) Rules-ah zirlaite chu category pathumah ṭhen an nih thu a sawi.

Ram leilung fate awmna tur category-I ah ram leilung fa ni lo dah an ni chu Mizo hnam tan him loa an ngaih thu sawiin MZP President chuan, "Category-I a ram leilung fate dah theitu leh ram leilung fa ni lote dah theitu chu Mizoram sorkar a ni. MZP-in vawi tam a au tawh chunga Mizoram sorkar a la harh thei lo hi pawi kan ti a, zirlaite'n thisen chhuak khawpin kan lo tawrh phah tawh

ṭhin bakah, Mizo mipui kan lungrual a ni tih hria a, he thil hi vei turin Mizoram sorkar kan ngen a ni," a ti.

Lalsangzuala Ngente chuan, The Mizoram (Selection of Candidates for Higher Technical Courses) Rules-a category-I huangah Chakma dah an nih chuan Mizoramin ram dang aṭanga dan loa lutte a pawm tihna ang a ni thei tih sawiin, "Chu chu Chakma hoin ṭan chhan atana an hman tur a ni ang tih hi MZP thlir dan a ni," a ti a; hnam thil ngaihven tak Chakmate'n Mizoram quota-a technical course zir hrim hrim ai pawhin category-I huanga awm hi an duh zawk ang tih a rinawm thu a sawi.

MZP hruaitute chuan, kumina NEET-a lang Chakma zirlaite chu Chakma Minister-in a lo mikhual bakah a buaipui tih sawiin, "Chakma zirlaite hi Mizoram sorkarin motor pein a hruai thlap thlap a. Minister Dr BD Chakma ṭhahnemngaihna vangin Mizo zirlaite hmachhawn turin police tam tham tak tirh an ni a, Chakma laka Mizo hnam him nana kalkhawm Mizo zirlaite'n Chakma minister vanga kut kan tuar hi ná kan ti. Chakma minister-in theihtawp a chhuah lai khan Mizo minister-te hi khawiah nge an awm tih MZP chuan a zâwt a ni," an ti.

Mizoram police vuak hliam zirlaite inenkawlna senso tumsak turin Mizoram sorkar an phût tih sawiin MZP hruaitute chuan, "Zirlai hliam tuarte enkawlna senso hi sorkar hian July 2017 ral hma ngeiin pe rawh se. Zirlaite hi an lú-ahte vuak an ni a, zirlaite tlu tawh pawh ṭum zui an ni a, thisen a chhuah bakah hmeichhiate pawhin an hliam a ni," an ti. Police leh zirlaite innawrnaah zirlai 22 an hliam niin an sawi a ni.

MZP hruaitute chuan, ram leilung fa ni lote laka ram leh hnam chhan tuma Mizo zirlaite'n ke an pên laia lo thlawptute chungah leh thuchhhuah siamtute chungah an lawm thu an sawi a, "Thinlung takin kan lawm a ni," an ti.

Total bandh an ṭhulh chhan sawiin MZP President chuan, "July 20 tlaiah Mizoram sorkarin inbiak a rawn rawt a, minister pathum, MLA pakhat leh commissioner meuhin MZP thil tum tihhlawhtlin a nih tur thu an sawi bakah, ziak meuha an dah avangin bandh neih a ngai ta lo a ni," a ti a; ram leilung fate chauhin category-I aṭangin an zir tur a ni tih chu an ngaihdan a nih reng thu a sawi.