Thinghlun leh Zawlpuia 4th. IR BOP Khâr lo turin YMA-in sorkar a ngen

Langkaih Group leh Taitesena Group YMA hruaitute July 22, Inrinnia ṭhu­khawm chuan resolution siamin, Mamit district-a Thinghlun khua leh Zawlpui khuaa 4th. IR battalion-te border outpost (BOP) sorkarin khar a tum chu ṭha lo an tih thu leh an phal loh thu an tarlang.

Mamit district-a YMA group pa­hnihte chuan, khawthlang lam chu hnam hrang hrang khawsakhona hmun a ni tih sawiin, "Hnam leh hnam karah te, state dang nentea inhmuh thiam loh cháng nei ṭhin khua leh vengte kan nih avangin kan thlamuanna leh kan rálmuanna ber kan sipaite hian min chhuahsan theiah kan ngai lo," an ti.

Mamit district chu state boundary-a awm a ni a, hel leh misual chi hrang hrang awm ṭhinna a nih avangin venghimtu sipai dah bel zawk turin an ngen a, "Khawthlang lam hian misual leh hel kut Mizoram pum hriatah vawi duai lo kan tuarin, harsatna chi hrang hrang kan tawh thin avangin sipai chhuahsan theih kan ni lo," an ti.

Rengdil khuaa 4th. IR batallion hmun tur sorkarin a hawn tawh pawh tihpuitlin a nih thuai theih nan chak taka hma la turin sorkar an ngen a ni.

Thinghlun leh Zawlpuia 4th. IR BOP chungchangah hian Hachhek Constituency Development Committee (HCDC) pawhin thuchhuah siamin, BOP pahnih chu khâr an remtih loh thu an tarlang a, "Hachhek bial hi Tripura leh Assam state rîa awm kan nih avangin hel pawl ṭhenkhat an awm reng a, IR an awm avang hian helte tan chêt ngaihna a awm loh avangin mipui kan thla a muang em em a ni," an ti.